PARLAMENT 2005

<a name=yux></a><a href=#01>"MÜSTƏQİL MEDİA 2005" SEÇKİ BLOKU</a>

<a href=#02>QADINLARIN SEÇKİ BLOKU</a>

<a href=#03>"GƏNC AZƏRBAYCAN - YENİ ADLAR"</a>

<a href=#04>"YENİ PARLAMENT" SEÇKİ BLOKU</a>

<a href=#05>"PARLAMENT 2005" HÜQUQŞÜNASLARIN SEÇKİ BLOKU</a>

<a href=#06>"YENİ SİYASƏT"</a>

<a href=#07>"İCTİMAİ LİDERLƏR" BİRLİYİ</a>

<hr>
<a name=01></a>"MÜSTƏQİL MEDİA 2005" SEÇKİ BLOKU

"Media 2005" Seçki Bloku bu il mayın 15-də təsis edilib. Blokun ilkin təsisçiləri ölkənin beş populyar qəzetinin baş redaktorları olub. Bunlar "525-ci qəzet"in baş redaktoru, Azərbaycan Yazıçılar Birliyinin katibi Rəşad Məcid, "Üç nöqtə" qəzetinin baş redaktoru Xoşqədəm Baxşəliyeva, "Olaylar" qəzetinin baş redaktoru Yunus Oğuz, "Şərq" qəzetinin baş redaktoru Akif Aşırlı və "Ədalət" qəzetinin baş redaktoru Aqil Abbasdır.
"Media 2005" Bloku parlament seçkilərində iştirak etməyi qarşılarına məqsəd yox, bir vasitə kimi qoyublar. Təsisçilər bildirirlər ki, bu vasitə Azərbaycan dövləti inkişaf etməsinə, parlamentimizin doğrudan da, xalq tərəfindən seçilmiş parlament olmasına xidmət etməlidir. "Müstəqil Media-2005" Blokunda təmsil olunan redaktorlar bəyan edirlər ki, onların seçkidə iştirakı medianın siyasətə qatılması kimi qiymətləndirilməməlidir. Media bitərəfliyini qorumalıdır: "Bloka üzv olan KİV-lər neçə illərdir bitərəflik göstəriblər. Kəskin qütblərə ayrılmış iqtidar və müxalifət mətbuatı sıralarında özlərinin bitərəf sözü ilə, müxtəlif qütblərə loyal münasibəti ilə tanınıblar. Azərbaycanın gələcək siyasi həyatında bu cür media tərəfdarlarının, müstəqil media nümayəndələrinin parlamentdə iştirakı zəruri hesab edilərək belə bir blok qurulub".
Blokun əsas məqsədi seçkilərin demokratik, şəffaf və ədalətli keçirilməsi üçün yardımçı olmaq, fəaliyyət göstərmək, monitorinqlərin keçirilməsi və maarifləndirmə işinin aparılmasıdır.
Sonradan "Media 2005" Blokuna "Həftə içi" qəzetinin baş redaktoru Sevinc Seyidova, "Yeni Qafqaz" qəzetinin baş redaktoru Ədalət Əliyev və "Təzadlar" qəzetinin baş redaktoru Asif Mərzili daxil olublar.

==<a href=#yux>yuxarı</a>==

<a name=02></a>QADINLARIN SEÇKİ BLOKU

Qadınların Seçki Bloku bu il mayın 14-də təsis edilib. Blokun təsisçiləri əsasəN Azərbaycan Qadın Hərəkatının liderləridir. Blokun məqsədi Azərbaycanda hüquqi dövlətin və vətəndaş cəmiyyətinin gücləndirilməsində və ictimai-siyasi proseslərdə qadınların rolunun artırılmasına, cəmiyyətdə gender bərabərliyinin təmin edilməsinə və 2005-ci il noyabrında Milli Məclisə nəzərdə tutulan seçkilərdə qadınların fəal iştirakına nail olmaqdır.
Bu Seçki Bloku yuxarıda qeyd edilənlərlə yanaşı, həm də qanun qəbulunda qadınların rolunun artırılması istiqamətində qadın hərəkatı qarşısında yeni vəzifələr qoyur, onları seçkilərdə fəal iştiraka həvəsləndirir. Blokun təsis ilə bağlı yayılan bəyanatda bildirilir: “Dövlət idarəçiliyində qadınların qərar qəbulu səviyyəsində iştirakının təmin edilməsi ölkəmizdə aparılan uğurlu dövlət qadın siyasətinə, Azərbaycanın qadın hüquqları ilə bağlı qoşulduğu bütün beynəlxalq konvensiyalara, həmçinin hüquqi və demoktratik cəmiyyətin prinsiplərinə uyğundur. Bütün bunları və Azərbaycanda gedən hüquqi dövlət və vətəndaş cəmiyyəti quruculuğunda qadınların məsuliyyətini nəzərə alaraq Milli Məclisə nəzərdə tutulan seçkilərdə qadınların fəallığının daha da artırılması və qadın hərəkatı tərəfindən irəli sürülən namizədlərin dəstəklənməsi istiqamətində bütün səy və imkanlarımızı səfərbər etmək məqsədilə Qadınların Seçki Blokunun yaradılmasını bəyan edirik.”
Blokun əsas məqsəd və vəzifələri aşağıdakılardır:
1. Milli Məclisə keçiriləcək seçkilərdə qadın seçicilərin və namizədlərin fəallığını artırmaq;
2. Seçkilərdə Blok üzvlərinin namizədliyinin kollektiv şəkildə müdafiə etmək, onların Milli Məclisə üzv seçilməsi üçün zəruri olan texniki və təşkilati dəstəyi təmin etmək;
3. Blok öz namizədliyini müstəqil verən qadınları və seçki ilə bağlı yaradılmış müxtəlif birliklərin qadın namizədlərini dəstəkləyə bilər;
4 .Bu məqsədlərə nail olmaq üçün bütün maraqlı tərəflərlə əməkdaşlıq etmək, ölkədə ictimai-siyasi sabitliyin, dövlətçiliyin və milli maraqların qorunmasına yardımçı olmaq;
5. Blok Milli Məclisə keçiriləcək seçkilərdə namizəd kimi iştirak etmək istəyən, Blokun məram və prinsiplərini, seçki platformasını qəbul edən istənilən qadın üçün açıqdır.
Blok aşağıda adları çəkilən qadınlar tərəfində yaradılıb:
1. Tamam Cəfərova - Milli QHT Forumunun vitse-prezidenti
2. Novella Cəfərova – D.Əliyeva adına Qadın Hüquqlarını Müdafiə Cəmiyyətinin sədri
3. Sevda Məmmədova – Azərbaycan Qadınlarının Milli Konfederasiyasının İdarə Heyətinin üzvü
4. Rəna Mirzəzadə - Gender və İnsan Hüquqları Araşdırmaları Mərkəzinin rəhbəri
5. Həvva Məmmədova - tarix elmləri doktoru, Dünya Azərbaycanlıları Konqresinin Qadınlar Şurasının sədri
6. Hicran Hüseynova - Bakı Dövlət Universitetinin dekan müavini, siyasi elmlər doktoru
7. Səadət Bənənyarlı - Beynəlxalq İnsan Hüquqları Cəmiyyətinin sədri ,
8. Səcidə Əbdülvahabova - fizika-kimya elmləri doktoru, BDU-nun professoru
9. Rəfiqə Qurbanova - Din və Maarifçilik Mərkəzinin sədri
10. Cəmilə Səttarova
11. Vəfa Əfəndiyeva
12. Əntiqə Qurbanova
13. Kifayət Niftəliyeva

==<a href=#yux>yuxarı</a>==

<a name=03></a>"GƏNC AZƏRBAYCAN - YENİ ADLAR"

"Gənc Azərbaycan – Yeni adlar" Seçki Bloku indiyə kimi müxtəlif fəaliyyət sahələrində vicdanla calışmış və uğur qazanmış gənc peşəkarlar tərəfindən yaradılıb. Blokun təsis edilməsi haqqında bu il mayın 27-də bəyanat verilib.

BLOKUN MƏQSƏDLƏRİ NƏDİR?
Blok Azərbaycan dövlətinin və cəmiyyətinin inkişafı ilə bağlı vahid mövqeyə və liberal baxışlara, yeni təfəkkür tərzinə malik yüksək intellektual potensialı olan gənc mütəxəssisləri birləşdirir və onların cəmiyyətdə tanıdılması və öz potensiallarını reallaşdırması istiqamətində fəaliyyət göstərir.
"Gənc Azərbaycan – Yeni adlar" partiya deyil. Siyasi mənsubiyyətindən asılı olmayaraq hər bir peşəkar və vətənpərvər Azərbaycanlı üçün açıq seçki blokudur.
Blokun məqsədləri aşağıdakılardır:
• Nə iqtidar, nə də müxalifət yönümlü qanunverici orqan deyil, məhz, Azərbaycanın həqiqi maraqlarını güdən peşəkar parlamentin seçilməsi və formalaşmasına;
• Bir millət kimi hamımızın siyasi yetkinlik imtahanı olan parlament seckilərinin azad və ədalətli keçirilməsinə;
• Müstəqil Azərbaycanın bayrağı altında boyüyüb ərsəyə gəlmiş gəncliyimizin, xüsusilə də yeni düşüncə tərzinə malik və peşəkarlar nəslinin bu seçkilərdə fəal iştirakına;
Seckilərin milli birliyimizin möhkəmlənməsinə və vətəndaş dialoqunun yaranmasına bir vəsilə olmasına nail olmaq.

BLOKUN FƏALİYYƏTİ NƏDƏN İBARƏTDİR?
Blok təsisçiləri hesab edirlər ki, 2005-ci ilin noyabr ayında keçiriləcək növbəti parlament seçkiləri Azərbaycanın ictimai-siyasi həyatında tarixi mərhələ olacaq. Bu mərhələnin necə başa çatması Azərbaycanın beynəlxalq arenada demokratik imicinə ciddi təsir göstərəcək. Eyni zamanda qarşıdakı 5 ildə Azərbaycan dövləti keyfiyyətcə yeni inkişaf mərhələsinə daxil olacaq və seciləcək parlamentin uğurlu fəaliyyəti onun yeniləşən cəmiyyətin tələblərinə nə dərəcədə cavab verməsindən asılı olacaq.
Blok üzvlərinin yaydığı bəyanatda göstərilir ki, Azərbaycanın beynəlxalq arenadakı mövqeyi, ali milli maraqlarımız demokratik, vətəndaşların hüquq və azadlıqlarını təmin edən dövlətin və azad cəmiyyətin qurulması yolunda atılan addımların və zəruri islahatların dərinləşməsini, dünyada qəbul olunan standartların ölkədə tez bir zamanda bərqərar olmasını tələb edir. Bu kimi vəzifələrin reallaşdırılmasında demokratik, azad və ədalətli seçkilər nəticəsində formalaşan parlament institutunun müstəsna rolu olacaqdır.
Yeni mərhələdə dövlətimizin qarşısında duran vəzifələri həyata keçirmək iqtidarında olan, dinamik inkişaf edən Azərbaycan üçün liberal qanunvericilik bazasını formalaşdıra bilən peşəkar qanunverici orqan seçilməlidir.
BLOK NƏ İSTƏYİR?
"Gənc Azərbaycan-Yeni adlar" bloku qanunların qəbul edilməsi prosesinə bir məqsəd kimi deyil, sosial-iqtisadi, hüquqi-institusional islahatların həyata keçirilməsi vasitəsi kimi baxır.
"Gənc Azərbaycan-Yeni adlar" bloku seçiləcək yeni parlamentdə populist çıxışların deyil, mütərəqqi və islahatçı fikir və ideyaların irəli sürülüb qəbul edilməsini istəyir .
Parlamentin qəbul etdiyi qanunlar azad cəmiyyətin üzvləri olan ölkə vətəndaşları üçün bərabər imkanların yaranmasını təmin etməli, varlı millət-varlı dövlət, güclü iqtisadiyyat- güclü dövlət prinsiplərinin reallaşdırılmasına şərait yaratmalıdır.
Azərbaycan parlamenti özünün qanunvericilik fəaliyyəti ilə geniş vüsət alacaq yeniləşmə prosesinin hərəkətverici qüvvəsinə çevrilməlidir.

"YENİ ADLAR" KİMLƏRDİR?
Blokun təsisçiləri arasında Milli Strateji Təşəbbüslər Mərkəzinin icraçı direktoru Fərhad Məmmədov, Antenn müstəqil teleradio şirkətinin prezidenti Rüstəm Əliyev, Bakı Gənclər Klubunun prezidenti Azər Cavadov, Dini Araşdırmalar Mərkəzinin rəhbəri Elçin Əsgərov, İslam Konfransı Təşkilatının Gənclər Forumunun baş katibi Elşad İsgəndərov var.

==<a href=#yux>yuxarı</a>==

<a name=04></a>"YENİ PARLAMENT" SEÇKİ BLOKU

Blokun təqdimat mərasimi bu il iyunun 13-də keçirilib.
Blokun məqsədi qarşıdan gələn parlament seçkilərində aktiv iştirak etməklə üzvlərinin qələbəsini təmin etməkdir. Bloka, Asif Əsgərov, Eldar Aslanov, Asif Nəsibov, Nabil Seyidov, Tural Kərimli və Bəhruz Nəzərov daxildir. Blok öz fəaliyyətini təsis olunduğu gündən Milli Məclisin yeni seçiləcək heyətinin ilk iclas gününə qədər davam etdirəcək. Blok əsas olaraq aşağıdakı istiqamətlərdə fəaliyyət göstərməyi nəzərdə tutur:
• Seçki qanunvericiliyinin təkmilləşdirilməsi (xüsusilə ilə depozit, exit-poll, QHT-lərin seçki komissiyalarında təmsili və sərbəst olaraq müşahidəyə buraxılması);
• Seçki mühitinin daha da yaxşılaşdırılması (məxsusilə seçicilərlə görüş imkanlarının artırılması, polemikaların gücləndirilməsi, blokların daha aktiv rol alması, peşəkarların müşahidəçi deyil, iştirakçı roluna gətirilməsi, KİV-dən, xüsusilə də elektron KİV-dən namizədlərə daha münasib və bərabər istifadə imkanları və s.);
• Seçki şəffaflığını daha da artırmaq (namizədlərin xalqa əmlak bəyannaməsi verməsi, blokların maliyyələşdirilməsi barədə KİV-ə müntəzəm hesabat, seçki komissiyalarının daha aşkar fəaliyyəti və s.);
• Blokumuzun sıralarını peşəkar insanlar hesabına genişləndirməklə ən azı 35 dairədə seçkilərə qatılmaq;
• Müntəzəm seminarlarla və dəyirmi masalarla seçkiqabağı ölkə problemlərini tapmaq, onları müzakirə etmək və həlli yollarını göstərmək;
• Bloklararası münasibətin sağlam rəqabət mühitinə çevirilməsi;
• Partiya əsaslı olmayan blokların inteqrasiyasına, dairələrin razılaşdırılmasına nail olmaq və «İçtimai Alyans» yaratmaq;
• Bütün namizədlərimizin dairələrində müşahidə və exit-poll şəbəkəsini qurmaq;
• Seçki ərəfəsində beynəlxalq institutlarla işləmək, onların seçkinin daha demokratik keçirilməsi üçün səylərindən istifadə etmək;
• Yeni seçki və PR texnologiyalarından istifadə etməklə uğurlu seçki kompaniyası təşkil etmək.
Blok doktor, magistr təhsili almış, gənclər təşkilatlarında, QHT-lərdə, beynəlxalq qurumlarda işləmiş, konkret nəticələr əldə etmiş, gənc insanlardan ibarətdir. Blok bütün siyasi partiyalardan eyni məsafədə durmağı özünün əsas vəzifəsi hesab edir. Blok fəaliyyətini üzvlərinin imzaladığı «Razılaşdırma Memorandumu» əsasında tənzimləyəcək. Blokun yaxın gələcəkdə qeyri-siyasi blokların alyansını - İCTİMAİ ALYANS yaratmağı planlaşdırır.
Blok seçki fəallığını və bərabər imkanları demokratik seçkilər üçün ilkin şərt hesab edir. Blok inqilabı ölkənin qarşılaşacağı ən son və arzu olunmaz variant hesab edir. Blok seçki qabağı iqtidar-müxalifət dialoqunu dəstəkləiyr və bu tip dialoqun ümumi mənafelərə xidmət etdiyini bildirir.

==<a href=#yux>yuxarı</a>==

<a name=05></a>"PARLAMENT 2005" HÜQUQŞÜNASLARIN SEÇKİ BLOKU

"Parlament-2005" Hüquqşünasların Seçki Bloku bu il mayın 16-da təsis edilib. Blok beynəlxalq təşkilatlarla və ölkənin digər vətəndaş cəmiyyəti qurumları ilə əməkdaşlıq şəraitində ölkədə azad və demokratik seçkilərin keçirilməsi, seçki qanunvericiliyinin təkmilləşdirilməsi, seçkilərin monitorinqinin təşkili, parlamentə namizədliyini irəli sürmüş ən layiqli nümayəndələrə dəstək verilməsi və s. istiqamətlərdə fəaliyyət göstərəcək. Blokun yaradılmasında əsas məqsəd bu proseslərdə hüquqşünasların daha fəal iştirakını təmin etmək, onların potensialından daha səmərəli istifadə etməkdir.
Blokun təsis yığıncağında qurumun Əsasnaməsi təsdiq edilib. 3 nəfərdən - Əlövsət Əliyev, Azərbaycan Hüquqçular Assosiasiyasının Ənnağı Hacıbəyli və Azərbaycan Hüquqşünaslar Forumunun həmtəsisçisi İntiqam Əliyevdən ibarət tərkibdə Koordinasiya Mərkəzi formalaşdırılıb. Həmçinin Blokun fəaliyyətinin əsas istiqamətləri, parlament seçkilərində iştirak edəcək layiqli namizədlərə dəstəyin formaları, başqa bloklarla əməkdaşlıq və s. məsələlər müzakirə olunub və müvafiq qərarlar qəbul edilib.
Təsisçilər bildirirlər ki, Hüquqşünasların Seçki Bloku siyasi yönlü deyil. Belə ki, Blok parlament seçkilərində namizəd irəli sürməyəcək. Onlar yalnız azad və ədalətli seçkilərin keçirilməsinə və layiqli namizədlərə dəstək verəcəklər. Və seçkilərdə bütün siyasi qüvvələrlə əməkdaşlıq ediləcək. Hüquqşünaslar əhalidə seçkiyə münasibətin dəyişməsinə nail olmağa çalışacaqlar. Seçicilərə aktiv və passiv seçki hüquqlarını reallaşdırmaqda hüquqi yardım göstəriləcək.
Bununla yanaşı, bloka daxil olan hüquqşünasların bir çoxu parlament deputatlarının əksəriyyətinin hüquqşünaslardan olmasının vacibliyini bildiririlər. Onların fikrincə, bu halda qanunların müzakirəsi daha səmərəli təşkil edilə bilər.
Hazırda bloka 30-dan çox hüquqşünas daxildir. Onlar arasında
Rəşid Hacılı - Media Hüquqları İnsititutunun direktoru
Vidadi Mirkamal – "Arbitr" hüquq şirkətinin prezidenti
Abbas Atakişiyev - müstəqil hüquq müşaviri
Muxtar Mustafayev - "Ədalət" hüquq firmasının direktoru
Namizəd Səfərov - Vəkillər Kollegiyasının üzvü
Vüqar Xasayev – Vəkillər Kollegiyasının üzvü
Əlövsət Əliyev – Beynəlxalq Miqrasiya Təşkilatının rəhbəri
Müzəffər Baxışov - hüquqşünas
Əyyub Kərimov - "Femida" qəzetinin baş redaktoru
Şahbaz Xuduoğlu - "Qanun" jurnalının baş redaktoru
Hafiz Həsənov - "VCİ" müstəqil məsləhət və yardım mərkəzi
İsaxan Aşurov - Müstəqil Hüquqşünaslar Liqasının sədri
Lətifə Əliyeva – 12 saylı hüquq firması
Ənnağı Hacıbəyli - Azərbaycan Hüquqçular Assosiasiyasının prezidenti
Sahib Məmmədov - Əmək Hüquqlarını Müdafiə Liqasının sədri
Abil Bayramov - "Xəzər" universitetində müəllim
İradə Cavadova - "Azleqal" hüquq şirkəti
Fərman Hüseynov – "Barrister" hüquq şirkətində icraçı direktor
və digərləri var.

==<a href=#yux>yuxarı</a>==

<a name=06></a>"YENİ SİYASƏT"

"YENİ SİYASƏT" Seçki Bloku bu il aprelin 12-də təsis edilib. Blokun strateji məqsədi Azərbaycanın siyasi sistemini korrupsiyalaşmış, avtoritar-klan quruluşundan demokratiyaya keçirməklə dəyişdirməkdir. Buna nail olmaq üçün bütün səviyyələrdə (prezident, parlament, bələdiyyə) azad, ədalətli, demokratik seçkilər, əsaslı siyasi, hüquqi, iqtisadi, institusional islahatlar keçirilməli, eləcə də həqiqi vətəndaş cəmiyyəti və xalq qarşısında hesabatlı, legitm hakimiyyət formalalaşdırılmalıdır.
YeS ölkənin bütün demokratik, islahatçı, vətənpərvər qüvvələri ilə konsensus yaratmaq, cəmiyyətinin qeyri-zorakı müqavimətini təşkil etməklə öz məqsədinə çatmaq uğrunda ardıcıl mübarizə aparmaq əzmindədir.
Bundan ötrü Blok hesab edir ki, ilk növbədə aşağıdakı vəzifələrin həyata keçirilməsi zəruridir:
- 2005-ci il parlament seçkilərinin ATƏT-in standartlarına uyğun olaraq azad, ədalətli və demokratik keçirilməsi üçün zəruri şəraitin yaradılması;
- parlament seçkilərində prioritet ümummilli məramları özündə əks etdirən «İctimai Saziş»ə imza atan şəxslərin namizədliklərinin irəli sürülməsi;
- dövlətçilik təfəkkürünə malik demokratik yönlü islahatçı şəxslərin çoxluq təşkil etdiyi parlamentin formalaşması məqsədi ilə blokun namizədlərinin dəstəklənməsi.
YeS öz fəaliyyətini Azərbaycan Respublikasının qanunları çərçivəsində, həmçinin iştirakçıların bərabərhüquqluğu, qərarların qəbulunda şəffaflığın təmin edilməsi şəraitində həyata keçirəcəkdir.
YeS müstəqil şəxsiyyətlərin seçki bloku kimi yaranır. Blok onun ümumi prinsiplərini, platformasını və namizədlərini dəstəkləyən, siyasi partiyaların, qeyri-hökumət təşkilatlarının, ictimai birliklərin və fərdlərin iştirakı üçün açıqdır.
YeS avtoritarizmdən demokratiyaya keçidi təmin etmək istiqamətindəki fəaliyyətində Azərbaycanın bütün vətənpərvər qüvvələrilə, demokratik yönümlü bloklarla, siyasi partiyalarla, ictimai təşkilatlarla, müstəqil namizədlərlə, azad mətbuatla, hər bir qeyri-hökumət və hökumət institutu, eləcə də beynəlxalq təşkilatlarla əməkdaşlıq etməyə hazırdır.
"Yeni Siyasət" Seçki Bloku Azərbaycanın siyasi sistemini avtoritar-klan quruluşundan demokratiyaya keçməklə dəyişdirmək məqsədilə yaradılan siyasi blokdur (siyasi təsisatdır).
Blok avtoritarizmdən demokratiyaya keçidə nail olmaq üçün bütün səviyyələrdə (prezident, parlament, bələdiyyə) azad, ədalətli, demokratik seçkilər və əsaslı siyasi, hüquqi, iqtisadi, institusional islahatlar keçirilməsini, eləcə də həqiqi vətəndaş cəmiyyətinin və leqitim, xalq qarşısında hesabatlı hakimiyyətin formalaşdırılmasını vacib vəzifələr sayır.
Blok ölkənin bütün demokratik, islahatçı, vətənpərvər qüvvələri ilə konsensus yaratmaq və cəmiyyətin qeyri-zorakı müqavimətini təşkil etməklə öz məqsədinə çatmaq uğrunda mübarizə aparır. Blok öz fəaliyyətini Azərbaycan Respublikasının Konstitusiyasına, qanunlarına, beynəlxalq hüquq normalarına və bu Əsasnaməyə uyğun qurur. Blok müstəqil şəxsiyyətlərin seçki bloku kimi yaranır. Blok onun ümumi prinsiplərini, platformasını və namizədlərini dəstəkləyən siyasi partiyaların, ictimai birliklərin və fərdlərin iştirakı üçün açıqdır.
Blok öz fəaliyyətini «Avtoritarizmdən demokratiyaya keçid haqqında» ictimai sazişdə öz əksini tapmış demokratik, firavan və bütöv Azərbaycan uğrunda aşağıdakı 7 addımın reallaşdırılması istiqamətində qurur:
- Azərbaycan cəmiyyətini səfərbər edərək onun ictimai və siyasi fəallığını artırmaq, kütləvi və qeyri-zorakı müqavimətini təşkil etmək yolu ilə noyabrda keçiriləcək parlament seçkilərinin saxtalaşdırılmasının qarşısını almaq, ölkədə ilk dəfə Azərbaycan xalqının azad seçim hüququnu təmin etmək;
- yeni pralamentdə demokratik, islahatçı, vətənpərvər qüvvələrin dayanıqlı çoxluğuna nail olmaq və bu əsasda qarşıdakı parlament seçkilərini konstitusion üsullarla Azərbaycanda avtoritarizmdən demokratiya keçidin dönüş nöqtəsinə çevirmək;
- yeni parlamentdə konstitusion və qanunvericilik islahatları keçirmək, prezident hakimiyyətinin səlahiyyətlərini məhdudlaşdırmaq, parlamentin hökumət üzərində nəzarətin gücləndirmək, məhkəmə hakimiyyətnin müstəqilliyini və səmərəli fəaliyyətini təmin etmək yolu ilə hakimiyyət qolları arasında effektiv tarazlığa nail olmaq;
- azad, ədalətli və demokratik prezident seçkiləri keçirmək yolu ilə legitim, cəmiyyət qarşısında hesabatlı hökumətin qurulmasına nail olmaq, ölkədə ifrat inhisarçılığı, total korrupsiya və məmur özbaşınalıqlarını aradan qaldırmaq, insan və mülkiyyət hüquqlarının reallaşmasına, səmərəli fəaliyət göstərən azad bazar iqtisadiyyatının formalaşmasına, hər bir vətəndaşın, cəmiyyətin və dövlətin təhlükəsizliyinin təmin edilməsinə yönəlmiş siyasi, iqtisadi, sosial, institusional islahatlar həyata keçirmək;
- azad, ədalətli və demokratik bələdiyyə seçkiləri keçirmək, bələdiyyələrin səlahiyyətlərinin genişlənməsi, maliyyə təminatının yaxşılaşması, fəaliyyətinin səmərəliliyinin artırılması yolu ilə hər bir Azərbaycan vətəndaşını yerli özünüidarəetməyə cəlb etmək və Azərbaycanın yeni demokratik sisteminin əsaslı bünövrəsinin qurulmasına nail olmaq;
- Azərbaycanın milli maraqlarını və müasir dünyanın reallıqlarını əsas tutaraq bütün maraqlı dövlətlərlə, o cümlədən qonşu ölkələrlə bərabərhüquqluluq və qarşılıqlı faydalılıq prinsipləri əsasında əməkdaşlığı gücləndirmək, Avroatlantik siyasi, iqtisadi və hərbi strukturlarına inteqrasiyanı təmin etmək, Azərbaycanın demokratik Avropa ailəsinə daxil olmasına və təhlükəsizliyinin etibarlı təminatının yaranmasına nail olmaq;
- yuxarıda nəzərdə tutulan addımların atılması, Azərbaycanın siyasi, iqtisadi, hərbi, insan kapitalı və s. baxımdan regionun ən qüdrətli dövlətinə çevrilməsi yolu ilə Qarabağ probleminin ədalətli həllinə, torpaqramızın işğaldan azad olunmasına, məcburi köçkünlərin öz yurd-yuvalarına qayıtmasına, ölkəmizin ərazi bütövlüyünün və suverenliyinin təmin olunmasına nail olmaq.

==<a href=#yux>yuxarı</a>==

<a name=07></a>"İCTİMAİ LİDERLƏR" BİRLİYİ

"İctimai Liderlər" Seçki Bloku bu il aprelin 22-də təsis edilib. Blokun yaradılması ilə bağlı yayıla bəyanatda göstərilirdi ki, 2005-ci ilin noyabrında Azərbaycan Respublikası Milli Məclisinə keçiriləcək seçkilərin ölkəmiz üçün yeni bir «demokratiya imtahanı» və dövlətin sonrakı inkişafı və tərəqqisini şərtləndirən mühüm amil kimi qəbul edilməsi vətəndaş cəmiyyəti təmsilçilərinin bu seçkilərdə daha fəal iştirak etməyə və üzərinə düşən missiyanı ləyaqətlə yerinə yetirməyə sövq edir.
Bütün bunları nəzərə alan birlik üzvləri ölkədə demokratiyanın, sosial ədalətin, söz və mətbuat azadlığının qorunması, iqtisadi və siyasi islahatların dərinləşməsi, Milli Məclisə nəzərdə tutulan seçkilərin şəffaf, ədalətli və azad keçirilməsi, həmin seçkilərdə vətəndaş cəmiyyəti təmsilçiləri tərəfindən irəli sürülən namizədlərin dəstəklənməsi istiqamətində bütün səy və imkanlarını səfərbər etmək naminə «İctimai Liderlər» (İL) Birliyini təsis ediblər.
Birliyin əsas məqsəd və vəzifələri aşağıda qeyd olunan məsələləri həyata keçirməkdən ibarətdir:
1. Milli Məclisə keçiriləcək seçkilərdə seçicilərin fəallığını artırmaq, seçkilərin demokratik, azad və şəffaf keçirilməsi üçün seçkiqabağı mühitin, seçki günü səslərin verilməsi, sayılması və rəsmiləşdirilməsi prosesi üzrə ictimai monitorinqi təşkil etmək;
2. Seçki məcəlləsini təkmilləşdirmək, ictimai birliklərin və digər vətəndaş cəmiyyəti qurumlarının seçkilərin məhdudiyyətsiz monitorinqi üçün mövcud olan hüquqi maneələri aradan qaldırmaq istiqamətində səylrəi davam etdirmək, bu məqsədlə Milli Məclis və beynəlxalq təşkilatlarla danışıqları intensivləşdirmək;
3. Seçkilərin keçirilməsi və nəticələrin qiymətləndirilməsi zamanı real faktlara istinad etmək və obyektivliyi gözləmək məqsədilə vətəndaş cəmiyyətinin bütün imkanlarından və təcrübəsindən faydalanmaq;
4. Seçkilərdə birlik üzvlərinin namizədliyini kollektiv şəkildə müdafiə etmək, onların Milli Məclisə üzv seçilməsi üçün zəruri olan texniki və təşkilatı dəstəyi təmin etmək;
5. Bu məqsədlərə nail olmaq üçün bütün maraqlı tərəflərlə əməkdaşlıq etmək, ölkədə ictimai-siyasi sabitliyin, dövlətçiliyin və milli maraqların qorunmasına yardımçı olmaq;
6. Birlik Milli Məclisə keçiriləcək seçkilərdə namizəd kimi iştirak etmək, seçkilərin demokratik və ədalətli keçirilməsi uğrunda mübarizə aparmaq niyyətində olan, birliyin məram və prinsiplərini, eləcədə birliyin seçki platformasını qəbul edən istənilən şəxs üçün açıqdır.
Blok əsasən aşağıdakı istiqamətdə fəaliyyət göstərməyi planlaşdırır:
- Azərbaycanın ərazi bütövlüyünün bərpası, qaçqın və məcburi köçkünlərin öz doğma torpaqlarına qayıtması, ölkədə vətəndaş cəmiyyətinin qurulması, demokratik dəyərlərə hörmətlə yanaşılması, qanunun aliliyi və insan hüquqlarının müdafiəsi, söz və mətbuat azadlığının təminatı sahəsində mövcud maneələri aradan qaldırmaq;
- Cəmiyyətdə sosial ədalət prinsipinə riayət olunması, iqtisadi və siyasi islahatların real nəticələr verməsi üçün ictimai müdaxiləni təmin etmək, dövlətin inkişafını ləngidən korrupsiya, qanunsuzluq, özbaşınalıq və digər bu kimi hallara qarşı fəal mübarizə aparmaq;
- Dövlətimizin inkişafı və milli maraqların müdafiəsi naminə ölkədə dialoqun, qarşılıqlı anlaşmanın və ictimai barışın əldə olunması, ictimai və siyasi sabitliyin qorunması istiqamətində vətəndaş cəmiyyəti institutlarının rolunu və təşəbbüskarlığını artırmaq;
- 2005-ci ilin noyabrında Milli Məclisə keçirilən seçkilərin demokratik, azad və şəffaf keçirilməsi məqsədilə seçkiqabağı mühitin və seçki günü səslərin verilməsi, sayılması və rəsmiləşdirilməsi prosesi üzrə ictimai monitorinqi təşkil etmək;
- Birlik üzvlərinin və vətəndaş cəmiyyətinin digər təmsilçilərinin Milli Məclisə keçirilən seçkilərdə iştirak edib qalib gəlməsi üçün məqsədyönlü iş aparmaq, bu məqsədlə onları texniki və təşkilatı baxımdan dəstəkləmək.
Blokun təsisçiləri aşağıdakılardır:
1. Azay Quliyev - Milli QHT Forumunun prezidenti
2. Sabit Bağırov – Sahibkarlığın və Bazar İqtisadiyyatının İnkişafına Yardım Fondunun presidenti
3. Eldar İsmayılov – Vətəndaş Cəmiyyəti Uğrunda mərkəzinin sədri
4. Osman Gündüz - Azərbaycan İnternet Forumunun prezidenti
5. Eyyub Hüseynov - Azad İstehlakçılar Birliyinin sədri
6. Umud Mirzəyev - Beynəlxalq Avrasiya Mətbuat Fondunun rəhbəri
7. Əhməd Qəşəmoğlu – "Tərəqqi və Demokratiya" İctimai Birliyinin rəhbəri
8. Rəna Səfərəliyeva - Transparency Azerbaijan təşkilatının rəhbəri
9. Rauf Zeyni- MQF Diaspora Mərkəzinin sədri
10. Qorxmaz İbrahimli - "Biosfer" ictimai birliyinin sədri
11. Aydın Kərimov Müstəqil Elmi-Praktik Hüquq Mərkəzinin prezidenti
12. Məhərrəm Zülfüqarlü – Azərbaycan Milli Araşdırma Assosiasiyasının icraçı direktoru
13. Qulu Məhərrəmli – BDU-nun müəllimi, AzTV-nin proqram rəhbəri

==<a href=#yux>yuxarı</a>==