Oqtay Əsədov üçüncü çağırış Milli Məclisin sədri seçilib. MM-in işində iştirak edən 106 deputatdan 105 onun lehinə, 1 nəfər isə əleyhinə səsə verib.
Oqtay Əsədov ona etimad göstərdiyinə görə, MM üzvlərinə təşəkkür edib, bundan sonra da uğurlu qanunvericilik fəaliyyəti ilə məşğul olmalarını arzulayıb. O, ötən beş il ərzində parlamentdə qanunların qəbul olunmasında iştirak etdiyini də deyib.

Bu gün Milli Məclisin yeni tərkibdə ilk iclası keçiriləcək. Bu barədə APA-ya parlamentin mətbuat xidmətinin rəhbəri Aqşin Babayev məlumat verib. A.Babayev bildirib ki, iclas təşkilati xarakter daşıyır. Qeyd edək ki, yeni tərkibdə ilk iclas parlamentin ən yaşlı deputatının sədrliyi ilə keçiriləcək. Parlamentin iclasında prezident İlham Əliyev çıxış edəcək.

<b>Səsvermənin son statistikasını kompyuterinizə yükləyə bilərsiniz:</b>

Excel faylı (son) - <a href="http://secki.info/sesverme.xls">yüklə</a>

Adobe PDF faylı (son) - <a href="http://secki.info/sesverme.pdf">yüklə</a>

Bu gün Konstitusiya Məhkəməsində seçkilərin nəticələrinin yoxlanılması və təsdiqi ilə bağlı Plenum keçirilir (APA). KM sədri Fərhad Abdullayevin sədrliyi ilə keçirilən iclasda məhkəmənin 7 hakimi, MSK sədri və üzvləri, ekspertlər, mütəxəssislər, xarici ölkə səfirliklərinin nümayəndələri və KİV mənsubları iştirak edib.
MSK katibi Vidadi Mahmudlu xəstə olduğundan iştirak etməyib. F. Abdullayev iclasın gündəliyi barədə məlumat verəndən sonra hakimlər çıxış edib. Məhkəmənin hakimi Ələddin Sultanov bildirib ki, seçki zamanı baş verə biləcək əyintilərin, qanun pozuntularının qarşının alınması məqsədi ilə prezident seçki praktikasının təkmilləşdirilməsinə dair 11 may və 25 oktyabr 2005-ci ildə sərəncam imzalayıb. Seçki Məcəlləsinə əsasən, MSK daxil olan müraciətlərin araşdıraraq 20 gün ərzində seçkinin nəticələri barədə qərar qəbul etməli və KM-yə göndərməlidir. MSK noyabrın 23-də yekun protokolu KM-yə təqdim edib. Məhkəmənin hakimi Rafael Qvaladze seçki pozuntuları ilə bağlı MSK-ya, məhkəmələrə və prokurorluğa edilən şikayətlər barədə məlumat verib.

Konstitusiya Məhkəməsinin (KM) qanun pozuntusuna yol verilmiş daha 6 seçki dairəsində seçkilərin nəticələrini ləğv edəcəyi gözlənilir. Bu barədə APA-ya Konstitusiya Məhkəməsindəki mənbələrdən bildirilib. Lakin KM sədrinin köməkçisi Sarıbəy İbrahimov bu barədə məlumatsız olduğunu deyib. O, seçkilərin nəticələrinə dair rəsmi məlumatların KM-in plenumunda açıqlanacağını söyləyib. Plenumun nə vaxt keçiriləcəyi isə yaxın günlərdə məlum olacaq.

Parlament seçkilərinin nəticələrinin tanınmasına dair bəyanata imza atanların siyahısının hazırlanmasında texniki səhvlərə yol verildiyindən Yeni Azərbaycan Partiyası (YAP) bununla bağlı yeni siyahı hazırlayır. Bu barədə APA-ya partiyanın mətbuat xidmətindən məlumat verilib. Məlumatda bildirilib ki, yeni siyahı bir neçə günə hazır olacaq və partiyanın saytına yerləşdiriləcək.

<b>Andres Herkel: "Biz təklif edəcəyik ki, seçkilərə dair xüsusi bəyannamə və ya bəyanat qəbul olunsun"</b>

Dekabrın 15-də Parisdə Avropa Şurası Parlament Assambleyası (AŞPA) Monitorinq Komitəsinin (MK) növbəti iclasında Azərbaycanda noyabrın 6-da keçirilmiş parlament seçkiləri bir daha müzakirə olunacaq. Bu məlumatı APA-ya AŞPA MK-nın Azərbaycan üzrə həmməruzəçisi Andres Herkel verib. Dekabrın 2-də digər həmməruzəçi Andreas Qrossla Bakıya gələcəklərini deyən A.Herkel AŞ-nın Seçkiləri Müşahidə Missiyasının rəhbəri Leo Platvoetin də onlarla birgə olmasını istisna etməyib. Həmməruzəçi bildirib ki, səfərin məqsədi seçkidən sonrakı vəziyyət, Mərkəzi Seçki Komissiyasına daxil olmuş şikayətlərin araşdırılmasını öyrənməkdir: "Bu məqsədlə Mərkəzi Seçki Komissiyasında və müxalifət nümayəndələri ilə görüşlər keçirəcəyik".

Dünən Yeni Azərbaycan Partiyasının (YAP) mətbuat xidmətindən "525"ə verilən məlumata görə, 2005-ci il noyabrın 6-da Milli Məclisə (MM) keçirilən seçkilərin demokratik, şəffaf, ədalətli olması və bu seçkilərin xalqın iradəsini əks etdirən nəticələrinin müdafiəsi ilə bağlı bir qrup deputatlığa namizədin yaydığı bəyanatı imzalayanların sayı 770 nəfərə çatıb. Məlumatda qeyd olunur ki, bəyanatı imzalayanların siyasi mənsubiyyəti ilə bağlı ümumi mənzərələri təhlil edərkən istisnasız olaraq bütün partiyalarda seçkilərin şəffaf və ədalətli keçirilməsi barədə rəyin mövcudluğu bir daha öz təsdiqini tapır. Məlumatda o da bildirilir ki, bəyanatı imzalayanlar arasında bitərəflər və bu seçkilərdə namizədliyini irəli sürmüş YAP üzvləri üstünlük təşkil ediblər. Bəyanata qoşulanların 150 nəfərə yaxını isə digər siyasi partiyaların və ictimai təşkilatların üzvləridir.

Dünən Avropa Şurası Parlament Assambleyasının (AŞPA) Daimi Komitəsinin üzvlərinin toplantısı keçirilib. Toplantıda Azərbaycanda keçirilən parlament seçkiləri müzakirə olunub. Bu barədə məlumatı APA-ya AŞPA-dakı nümayəndə heyətinin rəhbəri Səməd Seyidov bildirib. Onun sözlərinə görə, iclasda çıxış edənlər Azərbaycan-Avropa Şurası münasibətlərinin davam etdirilməsini, ölkəmizdəki demokratik inkişafa yardımçı olmaq istədiklərini deyiblər. İclasda müxtəlif fikir və rəylərin səsləndirildiyini deyən S.Seyidov həmçinin AŞ-nın Azərbaycanda keçirilən parlament seçkiləri üzrə müşahidə missiyasının rəhbəri Leo Platvoetin da çıxış edərək bir neçə məsələ ilə bağlı konkret münasibətini açıqladığını bildirib.

<b>Seçkidə baş verən mənfi halları təbii qarşılamaq lazımdır</b>

Dünən Yeni Azərbaycan Partiyasının (YAP) gənclər təşkilatının təşəbbüsü ilə 6 noyabr parlament seçkilərinin yekun nəticələrinə dair mətbuat konfransı keçirilib. Gənclərin seçki bloklarının, gənc namizədlərin, müşahidə aparan qeyri-hökumət təşkilatlarının nümayəndələrinin iştirak etdiyi tədbirdə bəyanat qəbul olunub.
YAP gənclər təşkilatının sədr müavini Zaur Adıgözəlov deyib ki, builki seçkilər demokratik və ədalətli keçirilib. Onun sözlərinə görə, seçkilərin demokratik və şəffaf keçirilməsində prezident İlham Əliyevin müstəsna xidmətləri olub: "Hesab edirik ki, Azərbaycan iqtidarının 2005-ci ilin əvvəllərindən etibarən parlament seçkilərinin demokratik şəraitdə keçirilməsi naminə göstərdiyi yüksək siyasi iradə, qətiyyət, imzalanan sərəncamlar seçkilərin şəffaflığını təmin edib. Azərbaycanın dövlət başçısı azad və ədalətli seçkilərin keçirilməsində hamıdan çox maraqlı olub. Bu məqsədlə 11 may və 25 oktyabr sərəncamlarını imzalayıb". Z.Adıgözəlov seçki zamanı bəzi qanun pozuntularının olduğunu da deyib. O bildirib ki, mənfi halların olmasına baxmayaraq, ümumilikdə, seçkilər demokratik keçirilib.