ANA SƏHİFƏ
SEÇİN Kİ, SEÇİLƏSİNİZ! 15 oktyabr 2003-cü il Azərbaycan Respublikasının Prezidenti seçkiləridir.
daha çox oxuyun    [1] [2] [3] [4] [5] [6] [7] [8]
[15.10.2003]   İsa Qəmbər: "Mən prezident seçkilərini udmuşam"
 ''Seçicilərin 60%-i mənə səs veriblər''
"Bizim Azərbaycan" blokundan prezident seçkilərinə namizəd, "Müsavat" partiyasının lideri İsa Qəmbər oktyabrın 15-də axşam "Müsavat" partiyasının polislə əhatələnmiş qərargahında jurnalistlər üçün brifinq keçirib. "Seçki məntəqələrində bizim müşahidəçilər tərəfindən aparılan səs sayımı göstərib ki, seçicilərin 60%-i mənə səs veriblər. Mən bu gün keçirilmiş seçkiləri udmuşam",- deyə o bildirib. Onun sözlərinə görə, hakimiyyət bütün yollarla bu qələbəni "oğurlamaq" və seçkilərin yekunlarını saxtalaşdırmaq istəyir. "Mən bununla barışmaq niyyətində deyiləm",- deyə o vurğulayıb və əlavə edib ki, "xalq öz qələbəsini müdafiə edəcək". Turan
[15.10.2003]   Polislə Müsavat tərəfdarları arasında amansız toqquşma olub
 Müsavat partiyasının tərəfdarları bu siyasi təşkilatı mühasirədə saxlayan polis kordonunu yarıb və əlbəyaxa savaşa girib.
Polis və mülki şəxslərin müsavatçıları yenidən mühasirəyə almaq cəhdi baş tutmayıb. Mitinqçilərə yeni etirazçılar qoşulur, onlar polislə davaya girir.Toqquşma getdikcə artır və qonşu küçələrə keçir. Zərərçəkənlərin sayı artır Turan
[15.10.2003]   Seçicilərin 62,78 faizi İ. Əliyevə səs verib
Anonim sorğunun nəticələrinə görə prezident seçkilərində İlham Əliyev seçicilərin 62,78 faiz səs toplayıb
"Şəffaf seçkilər" monitorinq mərkəzinin Seçki məntəqələrinin çıxışında (exit poll) keçirdiyi anonim sorğunun nəticələrinə görə,Azərbaycan prezidenti seçkilərində İlham Əliyevə seçicilərin 62,78 faizi səs verib. Sorğunun nəticələri oktyabrın 15-də axşam açıqlanıb. Həmin sorğuya görə, prezidentliyə namizədlər aşağıdakı ardıcıllıqla düzülmüşlər:
İsa Qənbər ("Musavat" partiyası) -14,65%,
Lalə Şövkət Hacıyeva ( Liberal partiyasının keçmiş sədri)-3,5%,
Etibar Məmmədov (Milli İstaqlaliyyət partiyasının lideri)-3,1%,
Sabir Rüstəmxanlı (Vətəndaş həmrəyliyi partiyası )-1,1 %
İlyas İsmayılov ("Ədalət" partiyasının sədri)-1,1 %,
Hafiz Hacıyev ("Yeni Musavat" partiyası)- 0,5% və
Qüdrət həsənquliyev ("AXC"partiyası Təşəbbüs qrupu)-0,2%.  Bizim əsr
[15.10.2003]  MÜSAVAT PARTİYASININ QƏRARGAHI QARŞISINDA GƏRGİN ANLAR
Saat 21:46. Müsavat Partiyasının qərargahı qarşısında gərgin anlar yaşanır.
Hazırda müsavat tərəfdarları Müsavat qarşısına toplanır.Xəbər.net hadisələri yaxın dəqiqələrdə sizə catdıracaq...  Xəbər.net
[15.10.2003]  İlham Əliyev seçkilərdə böyük üstünlük qazanıb
"Sel" Analitik İnformasiya və Sorğu Mərkəzi bu günkü seçkilərlə əlaqədar Bakı və Sumqayıt şəhərlərində səs verən 2005 vətəndaş sorğu keçirib. Sorğuda iştirak edənlərin 63 faizini gənclər, 22 faizini orta yaşlılar, 15 faizini isə yaşlılar təşkil edib. Onların 95 faizi müxtəlif peşə sahibləri olub. 5 faizi isə işsizlər təşkil edib. Respondentlərin 52 faizi kişi, 48 faizi isə qadın olub. Sorğunun nəticələri aşağıdakı kimidir. Bu gün kimə səs verdiniz 1. İlham Əliyev - 61.2 faiz 2. İsa Qəmbər - 13.8 3. Etibar Məmmədov - 3.6 4. Lalə Şövkət - 3.2 5. Sabir Rüstəmxanlı - 3.1 6. İlyas İsmayılov - 1.2 7. Qüdrət Həsənquliyev - 0.6 8. Hafiz Hacıyev - 0.3 9. Heç kimə səs verməyənlər - 13 QEYD: Sorğunun son nəticələri elan olunmazdan əvvəl keçiririlib. Ona görə də səsvermə faizlərinin dəyişə bilməsi mümkündür. 525ci q əzet  
[15.10.2003]  Heydər Əliyev Klivlend klinikasında səs verib
Azərbaycanın Vaşinqtondakı səfirliyindən AzərTAc-a bildiriblər ki, Amerika Birləşmiş Ştatlarının Klivlend şəhərinin klinikasında müalicə olunan dövlət başçısı Heydər Əliyev oktyabrın 15-də yerli vaxtla saat 8.30-da (Bakı vaxtı ilə saat 17.30-da) səs verib. Ölkəmizin Vaşinqtondakı səfirliyində prezident seçkilərinin keçirilməsi üçün təşkil edilmiş 17 saylı Yasamal üçüncü seçki dairəsinin Vaşinqton seçki məntəqəsinin komissiya üzvləri daşınan seçki qutusunu Klivlendə çatdırıb, beləliklə, prezident Heydər Əliyevin və orada olan digər Azərbaycan vətəndaşlarının seçki hüquqları təmin edilib. 525ci q əzet  
[15.10.2003]  ABŞ-ın Azərbaycandakı səfiri seçkilərin gedişindən razıdır
 ABŞ-ın Bakıdakı səfiri Reno Xarniş Azərbaycan prezidenti seçkilərində seçicilərin fəallığından razı qaldığını bildirib.
O, Mərkəzi Seçki komissiyası (MSK) yanındakı İnformasiya Mərkəzində bu haqda bəyanat verərək deyib: "Bu gün mən 3 seçki məntəqəsində oldum və seçicilərin fəallığından razıyam. Olduğum yerlərdə seçicilərin fəallığı 45 faizdən yüksək idi ". Reno Xarnişin sözlərinə görə, məntəqələrdən hər birində ABŞ-ı təmsil edən müşahidəçilər var. Nöqsanlar olan kimi onlar dərhal bu barədə Dairə Seçki komissiyalarına və MSK-ya məlumat verirlər. Səsvermə gedişində hələlik elə bir ciddi pozuntu olmayıb. Seçki məntəqələrində də hansısa hadisə baş verməyib. Xatırladaq ki, Azərbaycanda prezident seçkilərinin gedişini 1000-dən artıq xarici müşahidəçi izləyir. Onların əksəri-660 nəfəri-ATƏT-in Demokratik institutlar və insan hüquqları bürosunun üzvüdür. Avropa Şurasının Parlament Assambleyası- 32, ATƏT-in Parlament Assambleyası-24 müşahidəçi ilə təmsil olunublar. Müşahidəçilər arasında Fransa Milli Assambleyasının, İslam Konfransı təşkilatının, Lüksemburqun Avropa Şurası yanındakı daimi nümayəndəliyinin, Qara dəniz İqtisadi Əməkdaşlıq təşkilatı parlamentinin və Türkiyənin "Mərmərə" qrupunun nümayəndələri də vardır. Rusiya Mərkəzi Seçki Komissiyasının nümayəndələri MDB ölkələri müşahidəçiləri missiyasının tərkibində prezident seçkilərinin gedişini izləyirlər. MDB-nin icraçı katibi Yuri Yarov bu gün bəyanat verib ki, Azərbaycanda demokratik prezident seçkilərinin keçirilməsi üçün zəruri şərait yaradılıb. O, deyib: "Burada seçkilərin keçirilməsi üçün işlənib hazırlanmış metodologiya, seçki komissiyaları üzvlərinin peşəkarlığı, seçki bülletenlərinin hər cür saxtakarlıqlardan yüksək dərəcədə müdafiə olunması azad seçkilərin keçiriləcəyini gözləməyə imkan verir". Yarovun sözlərinə görə, o, bu gün Azərbaycanın şimal, qərb və mərkəzi rayonlarında, həmçinin Sumqayıtda 8 seçki dairəsində olub. MDB-nin icraçı katibi qeyd edib ki, Azərbaycanda "çox böyük hazırlıq işi aparılıb". Seçkilərdə bir çox yeniliklər tətbiq ediləcək, o cümlədən seçicilər səsvermədən sonra öz bülletenlərini xüsusi zərflərə qoyacaqlar. Yarov məlumat verib ki, MDB ölkələrindlən olan müşahidəçilər Azərbaycanda prezident seçkilərinin gedişi barədə öz yekun hesabatını başqa müşahidəçilərin fikrindən asılı olmayaraq hazırlayacaq. Bizim hesabatımız yalnız şəxsi müşahidələrimizə söykənəcək. O,eyni zamanda deyib ki, MDB nümayəndələri digər beynəlxalq müşahidəçilərlə, o cümlədən ATƏT-in Demokratik intstutlar və insan hüquqları bürosu ilə sıx əlaqədə işləyirlər. Azərbaycanın bir sıra regionlarında seçkiqabağı vəziyyətin təhlili müxtəlif fitnəkarlıqların ola bilməsi haqqında bəzi yerli qəzetlərin məlumatının doğruluğuna şübhə ilə yanaşmağa imkan verir. Əlbəttə, hansısa bir xoşagəlməz hadisənin yaranması istisna edilmir. Ancaq seçkiqabağı vəziyyətin inkişafına nəzər salsaq, görərik ki, burada heç bir kütləvi qanunsuzluq halları gözlənilmir. Yuri Yarov daha bir məsələyə diqqəti cəlb edib. Onun sözlərinə görə, Azərbaycanda prezidentliyə namizədlər arasında qarşılıqlı münasibətlərdə dözümlülük səviyyəsi bu ilin fevralında Ermənistanda prezident seçkiləri keçirilən zaman müşahidə edlidiyindən daha yüksəkdir. MDB -nin İcraçı katibi deyib ki,seçkilərə gəlmiş Birlik ölkələri müşahidəçilərinin missiyasına 200-ə yaxın ekspert də daxildir. Bizim əsr
[15.10.2003]  Azərbaycanda prezident seçkiləri başa çatıb
Azərbaycanda yerli vaxtla saat 19.00-da ölkə prezidentinin seçkiləri üzrə bütün seçki məntəqələri bağlanıb.
Hələ günün ortalarında aydın oldu ki, seçkiləri baş tutmuş hesab etmək olar. Respublika Mərkəzi Seçki Komissiyası yanındakı İnformasiya mərkəzinin saat 17.00-a olan məlumatına görə, ölkə seçicilərinin artıq 63,76 faizi səs verib ki, bu da 2 mln. 791 min 329 nəfər deməkdir. Mərkəzi Seçki komissiyası yanındakı İnformasiya mərkəzinin rəhbəri İqbal Babayevin məlumatına görə, seçki məntəqələrinin bağlanması anına kimi, səsverənlərin sayı haqqında məlumat saat 21.00 radələrinə yaxın elan olunacaq. Sonra İnformasiya Mərkəzinin zalında qurulmuş ekranlara prezidentliyə bütün 8 namizədin hamısının soyadları çıxarılacaq və məlumatlar daxil olduqca, onlardan hər birinə səs verənlərin sayı monitorlarda əksini tapacaq. İqbal Babayevin sözlərinə görə, seçki məntəqələrinin protokolları oktyabrın 15-i saat 22.00-dan oktyabrın 16-sı saat 20.00-dək İnformasiya mərkəzinə daxil olmağa başlayacaq. Mərkəzi Seçki Komissiyası ekspertlərinin hesablamalarına görə, seçkilərin ilkin nəticələri ya bu gecə, ya da cümə axşamı səhər tezdən elan ediləcək.  Bizim əsr
[15.10.2003]  Prezident seçkiləri fəal keçsə də, bəzi pozuntular vardır
BEYNƏLXALQ MÜŞAHİDƏÇİLƏR BELƏ HESAB EDİR
Beynəlxalq müşahidəçilərin fikrincə, Azərbaycanda prezident seçkiləri fəal keçir, lakin ayrı-ayrı pozuntular vardır. Azərbaycan prezidenti seçkilərində səsvermə seçicilərin yüksək fəallığı şəraitində keçir. MDB ölkələri müşahidəçiləri missiyasının rəhbəri, Birliyin icraçı kaitibi Yuri Yarov bu gün "İtar-Tass"a müsahibəsində belə deyib. Onun sözlərinə görə, "bu fəallıq sevindirir, lakin eyni zamanda seçicilər üçün narahatlıq yaradır. Ona görə ki, səsvermə məntəqələrinin bir çoxunun qarşısında növbələr yaranıb". Yarov indiki seçkilərdə çoxsaylı müşahidəçilərin iştirak etdiyini qeyd edərək deyib ki, zənnimcə, bu, "prosesin obyektivliyinə kömək edəcək". Eyni zamanda o, qeyd edib ki, "müşahidəçilərin iradları da vardır", o da bundan ibarətdir ki, "ayrı-ayrı məntəqələrdə bir sıra seçicilərin adı səsvermə siyahılarına daxil edilməyib". Bir qədər əvvəl Avropa Şurası Parlament Assambleyasının müşahidəçilər missiyasının rəhbəri və Avropa Şurasının Azərbaycan üzrə Monitorinq komitəsinin həmməruzəçisi Gilyermo Martines Kassanın "İtar-tass"a verdiyi bəyanatına görə, Azərbaycanda prezident seçkiləri demokratikdir, sakit və sərbəst şəraitdə keçir. O, eyni zamanda etiraf edib ki, əsas müxalifət qüvvəsi- "Musavat" partiyasından seçki qanunvericiliyinin pozulmasına dair 3 şikayət alıb. Kassan deyib: "Biz onları yoxlayıb, nəticəni ölkənin Mərkəzi seçki komissiyasına verəcəyik ". Azərbaycandakı seçkiləri 1000-dən artıq beynəlxalq və 40 mindən çox yerli müşahidəçilər, o cümlədən MDB ölkələrindən və Avropa Şurasından nümayəndələr izləyir. Seçkiləri 50-dən artıq nüfuzlu beynəlxalq mətbu və elektron kütləvi məlumat vasitəsinin yüzlərlə jurnalisti işıqlandırır Bizim əsr
[15.10.2003]  Vətəndaşların seçki aktivliyi
Mərkəzə Seçki Komisiyasından verilən məlumata görə vətəndaşların seçki aktivliyi
saat 10.00-a 14,54%;
saat 12.00-a 36,14%;
saat 15.00-a 56,53%;
saat 17.00-a 63,55%;  (2785214 nəfər) olub. Xatirladaq səsvermə hüququ olan seçicilərin ümumi sayı 4382828  nəfərdir.
[15.10.2003]  Müxalifət seçki prosesini pozmağa cəhd göstərir
SEÇKİ MƏNTQƏLƏRİNDƏN BİRİNƏ HÜCUM OLUB
Bu gün bir sıra seçki məntəqələrində müxalifətdən olan nümayəndələr seçkinin gedişini pozmağa cəhd göstəriblər. Etimad Əsədovun başçılıq etdiyi "Qarabağ Döyüşçülər Hərəkatı"nın Müsavat Partiyasında təmsil olunan, İ.Qəmbərin təbliğat kampaniyasında iştirak edən üzvləri Ağdam rayonunun seçki məntəqələrindən birinə gələrək dava salıb, komissiya üzvlərini təhqir edib, onlara qarşı güc tətbiq edib və seçki məntəqəsini yandırmağa cəhd göstəriblər. Onların qarşısı polis tərəfindən alınıb və günahkarlar saxlanılıb. Daha bir məlumata görə, AMİP öz tərəfdarlarına seçki qutularını götürüb qaçmaq və kütləvi şəkildə küçələrə çıxmaq haqqında göstəriş verməyə hazırlaşır. E.Məmmədov ona verilən səslərin çox az olmasından narahat olaraq öz tərəfdarlarına seçki qutularını oğurlamaq və kütləvi şəkildə küçələrə çıxmaq haqqında tapşırıq gözləmək barədə xəbərdarlıq edib. 20 saylı Nərimanov 2-ci seçki dairəsinin 19 saylı məntəqəsində Müsavatın məşvərət səsli müşahidəçisi Məmmədov Şahin Abbas oğlu seçicilərlə kobud davranaraq səsvermənin gedişinə birbaşa müdaxilə edib. Bu məsələ ilə bağlı protokol tərtib edilərək Ş.Məmmədov məntəqədən kənarlaşdırılıb. Atatürk liseyində yerləşən 40 saylı Nəsimi dairəsinin 2-caylı Ağdam şəhər məntəqəsində Müsavat Partiyasından müşahidəçi olan Babayev Xəyyam Soltan oğlu və ADP-ni təmsil edən müşahidəçi Tağıyev Nizami Novruz oğlu səsverməyə gələn vətəndaşları saxlayır, onları İ.Qəmbərə səs verməyə çağırırlar. Həmin şəxslər seçicilərlə birgə seçki kabinəsinə girir və seçiciləri öz namizədlərinə səs verməyə məcbur edirlər. AzərTAc-ın bir qədər əvvəl yaydığı məlumata görə, Oğuz rayonunda Zərrab kənd sakini 1966-cı il təvəllüdlü, Müsavat Partiyasını üzvü Kərimov Pərviz Eldar oğlu Kərimli kəndində yerləşən 52 saylı seçki məntəqəsində seçki komissiyasının üzvlərinə hədə-qorxu gələrək onları təhqir edib. P. Kərimov polis şöbəsinə gətirilib, xəbərdarlıq edildikdən sonra buraxılıb. Zərrab kənd sakini 1961-ci il təvəllüdlü, Müsavat Partiyasını üzvü Kərimov Zərrabi Qədir oğlu Kərimli kəndində yerləşən 53 saylı seçki məntəqəsində seçki ilə əlaqədar seçki komissiyasının üzvlərinə hədə-qorxu gələrək onları təhqir etdiyinə görə polis şöbəsinə gətirilib, xəbərdarlıq edildikdən sonra buraxılıb. Zərrab kənd sakini 1975-ci il təvəllüdlü, Müsavat partiyasını üzvü Davıdov Anar Vaqif oğlu Calud kəndində yerləşən 43 saylı seçki məntəqəsində seçki komissiyasının üzvlərinə hədə-qorxu gələrək onları təhqir etdiyinə görə polis şöbəsinə gətirilib, xəbərdarlıq edildikdən sonra buraxılıb. Şəki şəhəri - 113 saylı seçki dairəsinin 25 saylı seçki məntəqəsində AXCP Şəki şəhər təşkilatı tərəfindən bitərəf müşahidəçi kimi təyin edilmiş 1957-ci il təvəllüdlü Mahmudov Maqsud Məmməd oğlu seçkinin gedişinə maneçilik törətdiyi üçün barəsində akt tərtib edilərək məntəqədən kənarlaşdırılıb. Tərtər rayonu - 96 saylı Texniki peşə məktəbində yaradılmış 6 saylı seçki məntəqəsində Müsavat partiyasından olan müşahidəçi Əliyev Əhməd Məhəmmədəli oğlu seçkilərin gedişinə müdaxilə etmiş və komissiyanın üzvləri tərəfindən aktlaşdırılaraq tədbir görülməsi üçün polisə göndərilib. Nəsimi rayonu 22 saylı dairənin 22 saylı məntəqəsində Müsavat Partiyasını təmsil edən müşvərətçi müşahidəçi Lalə Fərəcova qalmaqal yaratmağa çalışaraq səsvermənin gedişini pozmağa səy göstərib. O, nəyin bahasına olursa-olsun hakimiyyətə gələcəklərini bildirərək İsa Qəmbərin xeyrinə çağırışlar səsləyib. Səbayel rayonun 7 saylı məntəqəsində ADP baş katibi Sərdar Cəlaloğlu öz dəstəsilə səsvermə məntəqəsinə gəlib. Onlar seçki qaydalarını pozaraq hamısı eyni vaxtda kabinəyə daci l olub və bülletenləri doldurduqdan sonra onları bir zərfə qoyaraq seçki qutusuna atıblar. Səbayel rayonunun 6 saylı məntəqəsində müğənni Flora Kərimova asayişi pozaraq İlham Əliyevə qarşı ayarlar qışqırıb və seçiciləri İsa Qəmbərin namizədliyini müdafiə etməyə çağırıb. Bu hadisə İ.Əliyev səs verdiyi vaxtda baş verib. 525ci q əzet
[15.10.2003]  Xalqın iradəsinin əleyhinə getmək dövlət, millət qarşısında cinayətdir
"Qələbə" koalisiyasının prezidentliyə namizədi, AMİP lideri Etibar Məmmədov bu gün saat 11.30-da Yasamal seçki dairəsinin məntəqələrindən birində səs verib.
 Jurnalistlərlə söhbətində Məmmədov deyib ki, bu seçkilərin, nəhayət ki, Azərbaycana xeyir gətirəcəyinə ümüd edir. Seçkilər demokratik olacaqmı sualına E.Məmmədov cavab verərək bildirib ki, "xalqın iradəsinin əleyhinə getmək dövlət, millət və Allah qarşısında cinayətdir". Məmmədov bildirib ki, səhərdən başlayaraq minlərlə adamın adının seçki siyahısına salınmaması ilə bağlı məlumatlar gəlir. Onun sözlərinə görə, adı siyahıya düşməyənlərin arasında AMİP-in xeyli tərəfdarı var. Seçkilərin ikinci mərhələsi mümkündürmü sualına E.Məmmədov müsbət cavab verib Turan
[15.10.2003]  Müxalifət kütləvi qanun pozuntuları barədə məlumat verir
 Seçki məntəqələrində səsvermə zamanı kütləvi qanun pozuntuları davam edir.
Demokratik Sabitlik İttifaqının bu gün saat 11.00-da AXCP (i) qərargahında keçirilmiş mətbuat konfransında bu barədə məlumat verilib. AXCP (i) sədrinin müavini Fuad Mustafayev bildirib ki, bu saata daha çox qanun pozuntusu Saatlı, Yevlax, Ağcabədi, Füzuli, Yasamal rayonlarında, eləcə də Şəki və Gəncədə qeydə alınıb. Qanun pozuntuları üçün xarakterik olanlar qutulara kütləvi bülleten atılması, müxalifətdən olan müşahidəçi və komissiya üzvlərinin polisin köməyilə məntəqələrə buraxılmaması, səsvermədən əvvəl bülletenlərin sayılmasından imtina olunması və s.dir. Qanun pozuntularının çoxu beynəlxalq müşahidəçilərin gözləri qarşısında baş verir. Müsavat partiyası başqanının birinci müavini Vurğun Əyyub bildirib ki, Gəncədə yerli müəllimlərin bir neçə dəfə səsverməsi barədə məlumatlar var. Belə ki, Gəncədə iki dövlət nişanlı avtobus (20 BL 548 və 20 BA 122) yerli pedaqoqları məntəqələrə daşıyır və onlar burada bir neçə dəfə səs verirlər. AMİP sədrinin müavini Əli Əliyev öz növbəsində bildirib ki, Sumqayıt, Binəqədi və Yasamal rayonlarının qarşısı adamlarla doludur və seçicilərin şikayətlərini vaxtında qəbul etməyi çatdırmırlar. Səbayel rayon məhkəməsinin qarşısında 150-yə qədər adam yığışıb, lakin məhkəmənin qapısı bağlıdır. DSİ-nin növbəti mətbuat konfransı saat 14.00-da Müsavat partiyasının qərargahında, saat 17.00-da isə Demokrat Partiyasının ofisində olacaq. Yekun mətbuat konfransı isə saat 20.00-da AMİP qərargahında keçiriləcək Turan
[15.10.2003]  Saat 12.00-a qədər səsvermədə seçicilərin 17.07%-i iştirak edib
Ölkədə 4.238.134 mln seçici var.
 "Azad və ədalətli seçkilər uğrunda" QHT, siyasi və beynəlxalq təşkilatlar Məşvərət Şurasının "Seçkilər" Müstəqil İnformasiya Mərkəzinin məlumatına görə, (www.infomerkez.org) saat 12.00-a qədər 59 dairə və 1623 məntəqə üzrə seçicilərin 17.07%-i səsvermədə iştirak edib. "Seçkilər" informasiya mərkəzinin rəhbəri Osman Qunduzov bildirib ki, göstərilən 1623 seçki məntəqəsi 1.33.109 (31%) seçicini əhatə edir. Mərkəzi seçki komissiyası saat 13.00-a kimi səsermə ilə bağlı öz saytına hər hansı məlumat yerləşdirməyib. MSK-nın mətbuat katibi Azər Sarıyev TURANa bildirib ki, saat 12.00-a kimi ölkədə 14% seçici səs verib Turan
[15.10.2003]  İlham Əliyev:«Mən Azərbaycanın gələcəyinə səs verdim»
 «Mən Azərbaycanın gələcəyinə səs verdim».
Bu sözləri prezidentliyə namizəd,baş nazir İlham Əliyev bu gün Səbail rayonu ərazisində yerləşən seçki məntəqəsində ailə üzvləri ilə birgə səs verdikdən sonra KİV nümayəndəlrinə müsahibəsində bildirdi. Jurnalistlərin «Seçkilərin II turunun keçirilməsi ehtimalı varmı?» sualını cavablandıran İ.Əliyev: «Buna cavab verməyəcəyəm.Bu rəqiblərimə qarşı qeyri-korrekt münasibət olardı» dedi. Prezident seçiləcəyi təqdirdə atacağı addımlar haqda məlumat verən İ.Əliyev Azərbaycanın müstəqilliyinin möhkəmlənməsi, sosial problemlərin həlli və Dağlıq Qarabağ münaqişəsinin beynəlxalq normalara uyğun nizamlanmasına çalışacağını bildirdi. O, «Azərbaycana sülh, sabitlik, iqtisadi inkişaf və dünya birliyinə inteqrasiya lazım olduğunu, vətəndaş müharibəsi, xaos və anarxiyayaya yenidən qayıtmağın isə gərəksizliyini» dedi. Baş nazir Prezident Heydər Əliyevin səhhəti ilə bağlı sualları cavablandırarkən qeyd etdi ki, atası ilə dünən əlaqə saxlamışdır. Heydər Əliyevin seçkilərlə bağlı heç bir narahatçılığı olmadığını deyən İ.Əliyev, onun internet vasitəsilə ölkədə gedən prosesləri izlədiyini vurğuladı  AssA-Irada
[15.10.2003]  İran KİV-i qadağan olmuş vaxtda İsa Qəmbəri təbliğ edib
Xatırladaq ki, İran televiziyalarını Azərbaycanın həmsərhəd cənub bölgələrində asanlıqla seyr etmək mümkündür
Seçkilərə 24 saat qalmış namizədlərin təbliğat kampaniyası aparılmasının Seçki Məcəlləsində qadağan edilməsinə baxmayaraq, oktyabrın 14-də, axşam saatlarında İran televiziyası Müsavat başqanı prezidentliyə namizəd İsa Qəmbərin geniş təbliğatını aparmışdır. Xarici telekanalların ölkə ərazisində yayımına məsul olan dövlət qurumunun rəhbəri-rabitə naziri Nadir Əhmədov bu gün jurnalistlərlə söhbətində buna öz etirazını bildirmişdir. «Dünən axşam olmuş bu hadisə barədə bizim də məlumatımız vardır.Bu qanunsuz işdir. Əgər hadisə bu gün də təkrarlanarsa, biz ona qarşı tədbir görəcəyik» -deyə Nadir Əhmədov vurğulamışdır. AssA-Irada
[15.10.2003]  Lalə Şövkət Hacıyeva seçkinin aktivliyindən razıdır
 Prezidentliyə namizəd, Liberal Partiyasının(ALP) sədri Lalə-Şövkət Hacıyeva 18 saylı Yasamal-Səbail seçki dairəsinin 21 saylı məntəqəsində səsvermədə iştirak etdi.
 Səsvermədən sonra müsahibə verən ALP sədri seçkinin aktiv keçməsindən razı qaldığını bildirdi.Bəzi bölgələrdə səsvermə zamanı insidentlərin baş verdiyini qeyd edən L.Ş.Hacıyeva prezident seçkisinin keçirilməsi ilə bağlı ALP-nin bəyanatını seçki bitdikdən sonra, saat 20-00-dan tez verməyəcəyini bildirdi AssA-Irada
[15.10.2003]  Spiker seçimini etdi
 «Bu gün öz səsimi Azərbaycanın xoşbəxt gələcəyinə, ən layiqli oğluna verdim».
Milli məclisin sədri Murtuz Ələsgərov xanımıyla birgə səhər saat 9-30-da 18 saylı Yasamal-Səbail seçki dairəsinin 18 saylı seçki məntəqəsində səs verəndən sonra bu barədə məlumat vermişdir. - Spiker səsvermənin Seçki Məcəlləsinin bütün tələblərinə uyğun aparıldığını,hər şeyin qaydasında cərəyan etdiyini, qayda-qanunun pozulmadığının şahidi olduğunu vurğulamışdır. Parlamentin rəhbəri baş nazir İlham Əliyevin sözlərinə istinadən hazırda ABŞ-da müalicə keçən prezident Heydər Əliyevin isə müalicə olunduğu yerdə səs verəcəyini bildirmişdir.M.Ələsgərov beynəlıxalq müşahidəçilərin də seçkiqabağı vəziyyəti normal qiymətləndirdiklərini, hazırlıq prosesindən xeyli razı qaldıqlarını da qeyd etmişdir   AssA-Irada
[15.10.2003]  SİM prezident seçkisinin ilkin nəticələrini elan etdi
 Seçkilər İnformasiya Mərkəzinin(SİM) prezident seçkisinin gedişi ilə bağlı ilkin hesabatı saat 10-30-da açıqladı. SİM-in rəhbəri İqbal Babayyevin verdiyi məlumata görə, bu saata kimi 582.855 nəfər səsvermədə iştirak etmişdir. Seçki prosesi zamanı heç bir qanun pozuntusuna yol verilməmişdir. İ.Babayevin sözlərinə görə, məntəqələrdə səsvermə aktiv surətdə davam edir. Respublika üzrə ən yüksək göstərici Şərur rayonunda (42,14%) qeydə alınmışdır. Paytaxta isə Nərimanov rayon seçiciləri aktivlik (19,28%) göstərmişlər.Xatırladaq ki, respublika üzrə seçicilərin ümumi sayı 4.376.921 nəfərdir AssA-Irada
[15.10.2003]  Sabah axşam Rəsul Quliyevin Bakıya qayıdışı gözlənilir.
 Oktyabrın 15-də, axşam saatlarında eks-spiker, ADP lideri Rəsul Quliyevin Bakıya qayıdışı gözlənilir.
Bu barədə ADP mətbuat xidmətindən bildiriblər. Ötən həftə Quliyev Azərbaycan xalqına müraciət edərək seçkilərdə "Bizim Azərbaycan" blokunun namizədi İsa Qəmbəri dəstəkləməyə çağırıb. Əldə olunmuş razılıqlara görə, İ.Qəmbərin qalib gələcəyi təqdirdə R.Quliyev baş-nazir vəzifəsini tutacaq Turan
[15.10.2003]  Səsvermə prosesi qanunun tələblərinə uyğun davam edir
Prezident seçkilərində Demokratik Seçki Mərkəzindən (DSM) 3 min nəfərdən artıq müşahidəçi iştirak edir.
DSM-dən Müstəqil Mətbuat Mərkəzinə bildirmişlər ki, Sumqayıt, Bakı, Naxçivan Muxtar Respublikası, Şəmkir və Bərdədə aparılmış müşahidələr göstərir ki, səsvermə prosesi qanunun tələblərinə uyğun davam edir. 41 saylı Sumqayıt I seçki dairəsinin 28 saylı məntəqəsində DSM nümayəndəsi ilə yanaşı beynəlxalq müşahidəçi Andreas Qross da iştirak edir. DSM-in Saatlı rayonun əlaqələndiricisi bildirir ki, saat 10-dək 62 saylı Saatlı seçki dairəsində seçicilərin 12 faizi səs vermişdir. 3 saylı Babək-Şərur seçki dairəsinin seçiciləri daha fəaldırlar. Saat 10-dək burada seçicilərin 37,9 faizi, başqa sözlə 13005 nəfəri səs vermişdir. 57 saylı Kürdəmir seçki dairəsində seçicilərin 16.9 faizi öz iradəsini ifadə etmişdir. Xəbər.net
[15.10.2003]  Hərbçilər seçkilərdə fəal iştirak edir
Azərbaycan Respublikası Prezidentinin seçkiləri başlanan ilk dəqiqələrdən Müstəqil Mətbuat Mərkəzinə müxtəlif zənglər daxil olur.
Səsvermə günü təxminən saat 9 radələrində ADP nümayəndəsi Nürəddin Məmmədli mərkəzlə əlaqə saxlayıb bildirdi ki, 20 saylı Nərimanov II seçki dairəsinin 31 saylı seçki məntəqəsinə 400-ə yaxın hərbçi gətirilərək onlara seçki bülletenləri verilmişdir. Məlumatı dəqiqləşdirərək öyrəndik ki, həmin ərazidə 2 hərbi hissə yerləşir və haqqında söhbət gedən hərbçilər orada qulluq edirlər. Onlar 31 saylı məntəqə seçki komissiyasının siyahısındadırlar. Müstəqil Mətbuat Mərkəzi
[14.10.2003]  "Seçkilər ədalətli və açıq şəraitdə keçiriləcək"
BAŞ NAZİR İLHAM ƏLİYEV DÜNƏN KEÇİRDİYİ MƏTBUAT KONFRANSINDA BİLDİRİB Kİ, SEÇKİLƏRDƏN SONRA AZƏRBAYCANDA SABİTLİYİ POZMAQ İSTƏYƏNLƏRİN QARŞISI ALINACAQ
Dünən Azərbaycanın baş naziri İlham Əliyev 15 oktyabr prezident seçkiləri ilə əlaqədar xarici ölkələrin kütləvi informasiya vasitələri üçün mətbuat konfransı keçirib. İ.Əliyev məlumat verib ki, bu seçkilər yeni qəbul olunmuş Seçki Məcəlləsi əsasında keçiriləcək. Məcəllənin çox demokratik sənəd olduğunu, beynəlxalq təşkilatların müsbət rəyini aldığını deyən İ.Əliyevin sözlərinə görə, seçki kampaniyası çox uğurla davam edir və artıq başa çatmaq üzrədir. O deyib ki, bütün namizədlər eyni şəraitə, eyni hüquqlara malikdir: "Hər bir namizədin öz fikirləri, siyasi platforması haqqında seçicilərə məlumat verməyə geniş imkanı var idi. Həm dövlət televiziyası vasitəsilə onlara geniş şərait yaradılmışdı, həm də bölgələrdə keçirilən görüşlərdə bunun üçün böyük imkanlar var idi. Ona görə də mən əminəm ki, bu seçkilər demokratik şəkildə, şəffaf və azad keçiriləcək. Seçkilərdən sonra Azərbaycanda gedən demokratik proseslər daha da inkişaf edəcək". Jurnalistlərin suallarını cavablandıran İ.Əliyev bildirib ki, prezident Heydər Əliyevin rəhbərliyi ilə aparılan demokratik islahatlar siyasətinə Azərbaycan qətiyyətlə əməl edir: "Ölkəmizdə çox qanunlar qəbul olunub və onlar demokratiyanı sözün əsl mənasında, inkişaf etdirməyə imkan verir. Artıq üç ildir ki, Azərbaycan Avropa Şurasının üzvüdür və qanunvericiliyimizi Avropa standartlarına uyğunlaşdırmaq işi, əslində, başa çatmaqdadır. Əminəm ki, seçkilərdən sonra ölkəmiz azad cəmiyyətin, demokratiyanın inkişafı üzrə öz xəttini davam etdirəcək. Bu, ilk növbədə, Azərbaycan xalqı və ölkəmizin uğurla inkişafı üçün vacibdir. Bu yolda bütün lazımi tədbirlər görüləcək. Əminəm ki, demokratik və ədalətli seçkilər keçirilməsi demokratiyanın inkişafı işinə böyük töhfə olacaq. Biz bu xəttə, Azərbaycanın dünya birliyinə inteqrasiyasına sadiqiq. Biz bu yolda böyük uğurlar qazanmışıq və o xətti davam etdirəcəyik". İ.Əliyevin sözlərinə görə, son 7 ildə ölkəmizdə ümumi daxili məhsulun artımı hər il 10 faiz olub. Bu isə hakim partiyanın qələbəsinə şübhə oyatmır. O qeyd edib ki, Azərbaycan xalqı 1993-cü ildə ölkədə baş verən olayların qayıtmasından qorxur: "Çünki indi müxalifətdə olanların rəhbərliyi ilə ölkə vətəndaş müharibəsi həddinə gəlib çıxmışdı, Ermənistan silahlı qüvvələri tərəfindən ərazilərimizin işğalına şərait yaradılmışdı. Hər bir kəs bilir ki, müxalifətin hakimiyyətə gəlməsi yenə də vətəndaş iğtişaşlarına, digər xoşagəlməz hadisələrə gətirib çıxara bilər. Bir vətəndaş kimi mən bunların hamısını görmüşəm və o hadisələrin təkrar edilməsini heç vaxt istəmərəm". İndi Azərbaycan uğurla inkişaf etdiyini deyən İ.Əliyev xarici sərmayələrin həcminə görə ölkəmizin təkcə keçmiş Sovet İttifaqı məkanında deyil, həm də Şərqi Avropa ölkələri arasında öncül mövqe tutduğunu bildirib: "Əgər insanlar yaxşı yaşamağa başlamışlarsa, bu vəziyyət niyə dəyişməlidir? İndi inflyasiyanın səviyyəsi 2 faizə enib. Belə siyasəti dəyişdirməyə əsas varmı? Əksinə, bu siyasət davam etdirilməlidir və əminəm ki, insanlar düzgün seçim edəcəklər". Azərbaycan hökumətinin seçkilərdən sonra ölkədə baş verə biləcək iğtişaşların qarşısının alınması üçün nə kimi tədbirlər görüləcəyi ilə bağlı suala cavabında baş nazir bildirib ki, müxalifət indidən məğlubiyyətlə barışmaq istəmir. "Çünki on ildən çoxdur ki, eyni şeyi deyən, yerinə yetirilməsi mümkün olmayan eyni vədlər verən müxalifət liderləri məğlubiyyətlə barışsalar, siyasət meydanından getməli olacaqlar. Ona görə də onların ən düzgün və ədalətli seçkiləri şübhə altına almasında təəccüblü bir şey yoxdur. Əgər hər hansı xoşagəlməz hadisələr baş versə, qanun çərçivəsində müvafiq tədbirlər görüləcək" - deyə İ.Əliyev vurğulayıb. İ.Əliyev bəyan edib ki, seçkilərdən sonra da ölkədə sabitlik olacaq. Onun sözlərinə görə, Azərbaycan bir dövlət kimi formalaşmıb, ona görə də dövlət heç kimə qanunları pozmağa imkan verməyəcək: "Seçkilər ədalətli və açıq şəraitdə keçiriləcək. Müntəzəm olaraq müxtəlif ictimai rəy sorğuları aparılır. Əgər seçkiləri işıqlandırmağa gələn jurnalistlər seçicilərin əhval-ruhiyyəsi ilə maraqlansalar, Azərbaycan vətəndaşlarının nəyə üstünlük verdiyi onlara da aydın olar. Odur ki, seçkilərin şəffaflığını şübhə altına almağa heç bir əsas yoxdur. Yeni demokratik Seçki Məcəlləsinin bütün cəhətləri nəzərə alınıb. Əgər kimsə Azərbaycanda sabitliyi pozmaq istəsə, qətiyyətlə dəf ediləcək". İ.Əliyev hakimiyyətə gələcəyi təqdirdə ölkə hökumətinin tərkibində kadr dəyişikliyi etməyəcəyini vurğulayıb. İ.Əliyevin sözlərinə görə, onun özü də Heydər Əliyev komandasının üzvüdür və burada hamını yaxşı tanıyır. O deyib ki, seçkilərdə qələbə qazandıqdan sonra onlarla əməkdaşlıq etməyi planlaşdırır: "Ona görə də hər hansı kadr dəyişikliyindən söhbət gedə bilməz". İ.Əliyev bildirib ki, H.Əliyevlə işləyən bütün adamlar "xalqa xidmət etmiş ləyaqətli insanlardır": "Mən onlarla birgə işləməyə hazırlaşıram". Dövlət başçısı seçildiyi halda atacağı addımlardan danışan İ.Əliyevin sözlərinə görə, o, ilk növbədə Azərbaycanın suverenliyini möhkəmləndirəcək və iqtisadiyyatını inkişaf etdirəcək: "Ölkədə bir dənə də olsun çadır şəhərciyinin qalmaması üçün qaçqın və məcburi köçkünlərin vəziyyətini yaxşılaşdırmaq xəttini davam etdirmək niyyətindədir". Prezidentliyə namizəd həmçinin ABŞ, Türkiyə, Rusiya, İran və digər dövlətlərlə əməkdaşlığın genişləndirilməsinin əhəmiyyətini vurğulayıb. Dağlıq Qarabağ münaqişəsinə toxunan baş nazir deyib ki, prosesin sülh yolu ilə tənzimlənməsi imkanları hələ tükənməyib. Ona görə də Azərbaycan tərəfi problemin dinc yolla həllinə sadiq qalır. Onun sözlərinə görə, gələcəkdə ATƏT-in Minsk qrupunun həmsədrləri tərəfindən münaqişənin tənzimlənməsinin yeni variantları təklif olunacaq. Baş nazir deyib ki, Azərbaycan xalqı münaqişənin hərbi yolla həllini istəmir: "Lakin biz öz torpaqlarımızın işğal altında qalması ilə heç vaxt barışmayacağıq". İ.Əliyev bildirib ki, Azərbaycanın hər bir vasitədən istifadə etmək hüququ var. Baş nazir prezident Heydər Əliyevlə bağlı sualı da cavablandırıb. O deyib ki, H.Əliyevin səhhəti normaldır və dövlət başçısı Azərbaycanda gedən prosesləri İnternet vasitəsilə izləyir. 525ci q əzet
[14.10.2003]  MSK MTN-ə müraciət etdi
Qarşıdurma yaratmaq istəyənlərin planları araşdırılacaq
Dünən Mərkəzi Seçki Komissiyasının növbəti iclası keçirilib. Gündəliyin müzakirəsinə keçməzdən əvvəl MSK sədri Məzahir Pənahov bəyan etdi ki, oktyabrın 15-i rəsmi iş günü deyil. Bununla bağlı mətbuatda MSK-nın rəsmi məlumatı dərc ediləcək. Sonra MSK-ya daxil olmuş müraciətlərə baxıldı. MSK üzvü Azər Tağıyev bildirdi ki, prezidentliyə namizəd İlham Əliyevin səlahiyyətli nümayəndəsi Əli Əhmədov MSK sədrinin adına müraciət edib. Müraciətdə göstərilir ki, müxalifət liderləri hakimiyyəti zorla devirmək, cəmiyyətdə qarşıdurma yaratmaq məqsədilə mətbuatda bu istiqamətdə təbliğat aparırlar. Bu məqsədlə AMİP, AXCP, ADP və Müsavat partiyalarının liderləri mətbuatdan gizli görüşlər keçirərək müəyyən təxribatların törədilməsi ilə bağlı planlar hazırlayıblar. Həmin təxribat planlarına görə, müxalifətçi Dairə Seçki Komissiyası üzvləri səsvermə günü beynəlxalq müşahidəçilər məntəqələrə gəldiyi vaxt qarşıdurma yaradacaq. Bununla da beynəlxalq müşahidəçilərə sübut edilməyə çalışılacaq ki, məntəqələrdə seçkilər demokratik keçirilməyib. QHT-lərsə bu istiqamətdə müxalifətə kömək edəcək. Eyni zamanda razılaşdırılmış plana görə, həmin partiyaların komissiya üzvləri protokolları imzalamaqdan imtina edəcəklər. Bu tipli məlumatları isə “Turan” İnformasiya Agentliyi hər iki saatdan bir yayacaq. Oktyabrın 16-da isə müxalifət liderləri mitinqlər təşkil etməklə, xalqı itaətsizliyə çağırmaqla qarşıdurma yaratmağa cəhdlər edəcəklər. Rusiyanın NTV və Türkiyənin bir neçə televiziya kanalları isə bu qarşıdurmaları çəkərək beynəlxalq aləmə yayacaq. Əli Əhmədov hesab edir ki, Azərbaycan Konstitusiyasını və Seçki Məcəlləsinin tələblərini pozan bu cür təxribat planlarının qarşısının alınması üçün MSK müəyyən tədbirlər həyata keçirməlidir. Prezidentliyə namizəd İlham Əliyevin səlahiyyətli nümayəndəsi Mübariz Qurbanlı bildirdi ki, müraciət səfirliklər, beynəlxalq təşkilatlara da göndərilib. Məlumatları həmin partiyalardakı mənbələrdən alıblar: “Məgər Vidadi Mahmudov Müsavat başqanının müavini Rauf Arifoğlunun məntəqələrdə zor tətbiq edilməsi ilə bağlı yazılarını oxumur?” M.Qurbanlı deyib ki, müxalifət uduzduğunu görərək daha azğın mübarizə aparır. Qarşıdurma yaratmaq istəyirlər. Müxalifətin mübarizəni aparmağı bacarmadığını söyləyən M.Qurbanlı Konstitusiyanın tələblərini pozan bütün cəhdlərin qarşısının alınacağını bildirdi. Müzakirələrdən sonra qərara alındı ki, YAP-ın müraciəti araşdırılması üçün Respublika Prokurorluğuna, Milli Təhlükəsizlik Nazirliyinə, Daxili İşlər Nazirliyinə göndərilsin. Sonra səsvermənin nəticələri haqqında MSK-nın protokolunun forması əsas kimi təsdiq edildi. Eyni zamanda seçicilərin fəallığı üzrə hesabat saatlarının müəyyən edilməsi haqqında MSK katibi İnqilab Nəsirov məlumat verdi. Onun dediyinə görə, seçicilərin fəallığı ilə bağlı 10.00-da 12.00-da, 15.00-da, 17.00-da və 19.00-da ictimaiyyətə məlumat veriləcək. İşğal altında olan şəhər və rayonlar üzrə yaradılmış seçki dairələrinin seçki məntəqələrində köçkün seçicilərin siyahıları ilə bağlı və ona əlavə edilən dəyişikliklərlə əlaqədar MSK-nın təşkilat şöbəsinin müdiri Zemfira Eminova məlumat verdi. Onun sözlərinə görə, köçkün seçicilər üçün 10 dairə seçki komissiyası yaradılıb. 122 saylı Xankəndi dairə komissiyası istisna olmaqla bütün dairələr vaxtında formalaşdırılıb. Həmin dairələrdə isə 567 məntəqə yaradılıb. Köçkün seçicilərin ümumi sayı isə 323984 nəfər qeydə alınıb.  Olaylar
[14.10.2003]  Etibar Məmmədov: "Gəlin yerlərimizi dəyişək,
İDDİALI TƏRƏF SİZ OLUN, PREZİDENTLİYƏ VAHİD NAMİZƏD İSƏ MƏN"
Məlum olduğu kimi, bu gün prezident seçkilərilə bağlı təbliğat-təşviqat kampaniyası sona çatır. Dünən AMİP sədri, prezidentliyə namizəd Etibar Məmmədov bu müddət ərzində partiyanın gördüyü işlər, təşviqat kampaniyasının yekunları ilə bağlı mətbuat konfransı keçirib. Azərbaycanın bir çox rayonunda seçicilərlə görüşdüyünü deyən prezidentliyə namizəd əhalinin fəallığının artdığını vurğulayıb: "Bu faktor bizim qətiyyətimizin daha da artmasına səbəb olub". E.Məmmədov seçki qanunlarının ona bir sıra problem yaratdığını deyib. O bildirib ki, Seçki Məcəlləsində bir çox müəmmalı müddəalar var: "Ona görə də Mərkəzi Seçki Komissiyasında qəbul olunan təlimatlar bir çox halda qanunlara zidd olub". Xüsusən seçicilərlə görüşləri zamanı ciddi problemlərlə üzləşdiyini deyən AMİP sədrinin sözlərinə görə, seçkiöncəsi mübarizədə hakimiyyət və müxalifət namizədlərinə qeyri-bərabər şərait yaradılıb: "Təşviqat kampaniyası zamanı icra strukturlarının nümayəndələrindən istifadə oluna bilməz. Amma buna əməl edilməyib". E.Məmmədovun fikrincə, bütün bunlar hakimiyyətin seçkilərin nəticələrini saxtalaşdırmaq niyyətində olmasından xəbər verir: "Biz saxtakarlığın qarşısını almaq üçün həm beynəlxalq təşkilatlar, həm də siyasi partiyalarla əməkdaşlığı davam etdiririk". AMİP sədri deyib ki, saxtakarlığın qarşısının alınması üçün həm rəhbəri olduğu partiyanın, həm də AXCP-nin ("islahatçılar") müşahidəçiləri və komissiya üzvləri yerlərdə birgə fəaliyyət göstərəcəklər: "Bundan başqa digər partiya nümayəndələrilə də əməkdaşlıq ediləcək". AMİP sədri onun təbliğatının aparılmasına iqtidarla yanaşı, müxalifət qüvvələrinin də maneələr törətməyə çalışdığını deyib. Bu işdə bəzi müxalifət partiyaları ilə hakimiyyətin maraqlarının üst-üstə düşdüyünü deyən prezidentliyə namizəd belə məsələlərə fikir vermədiyni bildirib: "Bu bizim ümumi işimizə ancaq ziyan gətirir. Biz dəfələrlə qarşı tərəfdən xahiş etmişik ki, belə hallara yol verilməsin. Hətta bununla bağlı dörd partiya liderinin London görüşündə də ayrıca razılaşma olub. Təəssüf ki, buna əməl etməyən qüvvələr var. Ancaq mən öz təbliğatımı aparmaqla məşğulam. Hesab edirəm ki, hərə öz işilə məşğul olsa, yaxşıdır". Qeyd edək ki, mətbuat konfransından əvvəl AMAL Ziyalı Hərəkatının bir neçə üzvü və Azərbaycan Xalq Partiyasının sədri Pənah Hüseyn E.Məmmədovla görüşüb. AMİP sədri bildirib ki, sözügedən şəxslər müxalifətin seçkilərə vahid namizədlə getməsilə bağlı təklif irəli sürüblər. E.Məmmədov isə onların qarşısında yeni təkliflə çıxış edib: "Onlara dedim ki, qarşı tərəf məni böyük iddialarda olmaqda ittiham edir. Buna görə də gəlin yerlərimizi dəyişək. Həmin iddialı tərəf siz olun, prezidentliyə vahid namizəd isə mən". AMİP sədrinin sözlərinə görə, qarşı tərəf onun bu təklifinə cavab verməyib. Bundan sonra vahid namizədin müəyyənləşməsinin mümkünlüyünə dair suala E.Məmmədovun cavabı belə olub: "Hesab edirik ki, vahid namizədin müəyyənləşməsi kiminsə hakimiyyətə gətirilməsi yox, bu rejimin dəyişdirilməsi üçün lazımdır. Azərbaycanın bu vəziyyətdən çıxarılması naminə isə ölkə Konstitusiyasında dəyişiklik edilməsi vacibdir. Qarşı tərəf isə bununla razılaşmadı. Belə çıxır ki, kimsə prezident olacağı təqdirdə səlahiyyətlərinin az olacağından qorxur. Mən isə məhz bu cür prezident olmaqdan çəkinmirəm". 525ci q əzet
[14.10.2003]  Sabir Rüstəmxanlı gizli danışıqlar aparıbmı?
VHP BUNUNLA BAĞLI YAYILAN İNFORMASİYALARI RƏDD EDİR
Müxalifət arasında bağlanmış qarşılıqlı əks-təbliğat aparmamaq sazişinin ziddinə olaraq VHP sədri, prezidentliyə namizəd Sabir Rüstəmxanlıya qarşı "qara piar" texnologiyası işə düşüb. "Bizim Azərbaycan" blokunun bəzi üzvləri VHP sədrini gizli danışıqlar aparmaqda suçlayıblar. VHP-nin mətbuat xidmətindən "Olaylar"a bildiriblər ki, bu, Sabir Rüstəmxanlının seçkiyə müstəqil qatılmaqda qərarlı olması ilə bağlıdır: "İsa Qəmbərin son çıxışında namizədləri öz blokuna dəvət etməsindən sonra başlanan danışıqlarda özlərinə sərf edən cavabı almayandan sonra artıq bu informasiyanı gündəmə buraxıblar. Təəssüf edirəm ki, seçkiyə iki gün qalmış xislətlərini göstərdilər. Axıradək dözə bilmədilər". Mətbuat xidməti bu hücumların Sabir Rüstəmxanlının reytinqinə təsir etməyəcəyini bildirib: "Bizə şər atmağa çalışırlar. Onların təklifini qəbul etsəydik, belə deməzdilər". Olaylar
[14.10.2003]  Bu gün səhər saat 8.00-dan seçkilərlə bağlı təbliğat-təşviqat kampaniyası dayandırılır
MSK-nin MƏTBUAT MƏRKƏZİNİN RƏHBƏRİ AZƏR SARIYEV: "SEÇKİ GÜNÜNƏ 24 SAAT QALMIŞ RƏY SORĞULARININ KEÇİRİLMƏSİ, SEÇKİ GÜNÜ SEÇKİ MƏNTƏQƏLƏRİNDƏ NAMİZƏDLƏRDƏN HANSININSA XEYRİNƏ SƏS VERMƏYƏ ÇAĞIRILMASI QADAĞANDIR"
"Seçki Məcəlləsinin tələblərinə görə, seçki gününə 24 saat qalmış prezidentliyə namizədlərin təbliğat-təşviqat kampaniyası dayandırılır". Bu haqda məlumatı "525"in müxbiri ilə söhbətində Mərkəzi Seçki Komissiyasının (MSK) mətbuat mərkəzinin rəhbəri Azər Sarıyev dilə gətirib. Onun sözlərinə görə, prezidentliyə namizədlərin təbliğat-təşviqat kampaniyası 14 oktyabr səhər 8.00-dan etibarən başa çatır: "Bütün hallarda ayın 14-dən 8.00-dan etibarən təbliğat-təşviqat kampaniyası dayandırılmalıdır. Bundan əlavə, dövlətin konstitusion quruluşunun, ölkənin sərhədlərin zorakılıqla dəyişdirilməsinə yönələn, irqi, milli ayrı-seçkilik toxumu səpən çıxışlara yol verilməsi qadağan olunur". A.Sarıyevin bildirdiyinə görə, seçkilərə 24 saat qalmış müddət ərzində prezidentliyə namizədlərlə bağlı mətbuat və elektron kütləvi informasiya vasitələrində təşviqat xarakterli yazıların, müsahibələrin, məlumatların, reklam mətnlərinin və çarxlarının verilməsi qadağan olunur: "Bundan başqa, həmin vaxt ərzində rəy sorğularının keçirilməsi, seçki günü seçki məntəqələrində namizədlərdən hansınınsa xeyrinə səs verməyə çağırılması qəti qadağandır". 525ci q əzet
daha çox oxuyun    [1] [2] [3] [4] [5] [6] [7] [8]
"SMILE" informasiya mərkəzi
əlaqə telefonları: 658-182; 652-652; admin@secki.info