ANA SƏHİFƏ
SEÇİN Kİ, SEÇİLƏSİNİZ! 15 oktyabr 2003-cü il Azərbaycan Respublikasının Prezidenti seçkiləridir.
daha çox oxuyun    [1] [2] [3] [4] [5] [6] [7] [8] [9]
[01.11.2003]  Eks namizədlər borclarını qaytarmırlar?
 MSK Azərbaycanda prezident seçkilərinin keçirilməsinə ayrılmış 22 mlrd manatdan 2 mlrd manata yaxın vəsaitə qənaət etmişdir.
Əgər seçkilərdə 5%-dən az səs toplamış prezidentliyə namizədlər onlara seçkiqabağı kampaniya üçün ayrılmış büdcə vəsatini qaytarmaqdan imtina etsələr, qanunvericiliyə uyğun olaraq onlar barəsində tədbirlər görüləcək. Bu barədə jurnalistlərə Mərkəzi seçki komissiyasının sədri Məzahir Pənahov bəyan etmişdir. Qeyd edək ki, prezident seçkilərinin nəticələri ilə bağlı Konstitusiya məhkəməsinin qərarından sonra prezidentliyə sabiq namizədlər arasında ixtilaf yaranmışdır. İş burasındadır ki, MSK-nın qəbul etdiyi qərara əsasən, seçicilərin 5%-dən azının səsini toplamış hər bir namizəd onlar üçün dövlət büdcəsindən seçkiqabağı kampaniya aparmaq üçün ayrılmış 60 mln manatı qaytarmalıdır. 5%-i aşmayan bəzi prezidentliyə sabiq namizədlər təsdiq edirlər ki, MSK-nın bu qərarı qanunsuzdur. Onların arasında Vətəndaş həmrəyliyi partiyasının lideri Sabir Rüstəmxanlı, "Ədalət" partiyasının sədri İlyas İsmayılov , Lalə Şövkət Hacıyeva vardır. M.Pənahov isə hesab edir ki, bu məsələdə heç bir problem yoxdur və sabiq namizədlər yaxın vaxtlarda borcları qaytaracaqlar. O, demişdir:"Düşünmürəm ki, prezidentliyə namizədlərimiz elə səviyyədə deyillər ki, onlar barəsində həbs qətimkan tədbiri seçilməsinə imkan versinlər. Hesab edirəm ki, bu məsələ özünün müsbət həllini tapacaq". M.Pənahov həm də məlumat vermişdir ki, MSK Azərbaycanda prezident seçkilərinin keçirilməsinə ayrılmış 22 mlrd manatdan 2 mlrd manata yaxın vəsaitə qənaət etmişdir. O, sözünə əlavə etmişdir ki, bu vəsait dövlət büdcəsində qalacaq. Trend
[01.11.2003]  İlham Əliyev ilk fərmanını imzaladı
Dünən Heydər Əliyev Azərbaycan Respublikasının prezidenti kimi son fərmanını verib. Fərmana əsasən İlham Heydər oğlu Əliyev Azərbaycanın prezidenti seçilməsi ilə əlaqədar baş nazir vəzifəsindən azad edilib. Dünən yeni prezident İlham Əliyev ilk fərmanı imzalayıb. Sənədə əsasən yeni tərkib formalaşdırılanadək Nazirlər Kabineti üzvlərinin səlahiyyətlərinin icra edilməsi Kabinetin əvvəlki tərkibinə həvalə olunub.  525-ci qəzet
[01.11.2003]  Prezident İlham Əliyevinandiçmə mərasimi keçirildi
 İLHAM ƏLİYEV: "BİZ HAMIMIZ BİRLƏŞƏRƏK AZƏRBAYCANIZƏNGİN DÖVLƏTƏ ÇEVİRƏCƏYİK"
Dünən Respublika sarayında Azərbaycanın yeni seçilmiş prezidenti İlham Əliyevin andiçmə mərasimi keçirilib. Mərasimdə 200 nəfərdən çox xarici qonaq, o cümlədən Gürcüstan prezidenti Eduard Şevardnadze, Rusiya Federasiyası Şurasının sədri Sergey Mironov, Türkiyə baş nazirinin müavini Əbdül Nəsir Şənər, İranın vitse-prezidenti Seyid Məhəmmədəli Əbtəhi və Ukrayna hökumətinin başçısı Viktor Yakuboviç iştirak ediblər. Mərasimdə ilk çıxış edən Mərkəzi Seçki Komissiyasının (MSK) sədri Məzahir Pənahov oktyabrın 15-də Azərbaycanda azad və ədalətli seçkilərin keçirildiyini deyib. M.Pənahov builki seçkiləri digərlərindən fərqləndirən mühüm cəhətlərdən birinin də ölkə vətəndaşlarının seçkilərdə göstərdikləri fəallıq olduğunu söyləyib: "Öz seçici hüququnu həyata keçirmək üçün seçicilərin 71,23 faizi məntəqələrə gələrək səsvermədə iştirak ediblər. Onların böyük əksəriyyəti vətənin tərəqqisi, xalqın xoşbəxt gələcəyi naminə İlham Əliyevə səs veriblər".
M.Pənahov İlham Əliyevin 76,84 faiz səs toplayaraq növbəti beş il müddətinə Azərbaycanın prezidenti seçildiyini bəyan edib. Sonra söz Konstitusiya Məhkəməsinin sədri Fərhad Abdullayevə verilib. Konstitusiya Məhkəməsinin 28 oktyabr 2003-cü il tarixli qərarı ilə prezident seçkilərinə dair MSK-nın nəticələrinin təsdiq olunduğunu və İlham Əliyevin Azərbaycan Respublikasının prezidenti elan olunduğunu xatırladan F.Abdullayev İlham Əliyevi and içməyə dəvət edib: "Azərbaycan Respublikasının prezidenti seçilmiş cənab İlham Əliyevi Konstitusiyanın 103-cü maddəsinə uyğun olaraq Konstitusiya Məhkəməsi hakimlərinin iştirakı ilə and içməyə dəvət edirəm"."Azərbaycan Respublikası prezidentinin səlahiyyətlərini həyata keçirərkən Azərbaycan Respublikasının Konstitusiyasına əməl edəcəyimə, dövlətin müstəqilliyini və ərazi bütövlüyünü qoruyacağıma, xalqa ləyaqətlə xidmət edəcəyimə and içirəm. Əlimi Qurani-Şərifə basaraq and içirəm, Azərbaycan xalqının əsrlər boyu yaratdığı milli-mənəvi dəyərlərə və ənənələrə sadiq qalacaq, onları daim uca tutacağam" - deyə and içən İlham Əliyev prezident seçilməsində ona etimad göstərdiyinə görə Azərbaycan xalqına təşəkkürünü bildirib.Daha sonra İlham Əliyev mərasim iştirakçıları qarşısında nitq söyləyib.
O, xalqın göstərdiyi etimadı doğruldacağını və prezident vəzifəsinin öhdəsindən layiqincə gələcəyini bəyan edib. Prezident oktyabrın 15-də Azərbaycan xalqının seçki məntəqələrinə gələrək Heydər Əliyev siyasətinə səs verdiyini və Azərbaycanda bu siyasətə alternativ olmadığını bildirib. Heydər Əliyev siyasətinin Azərbaycana böyük uğurlar gətirdiyini deyən dövlət başçısı bu siyasətin nəticəsi olaraq ölkənin bütün sahələrinin inkişaf etdiyini qeyd edib. İlham Əliyev Heydər Əliyevin siyasəti nəticəsində Azərbaycanın beynəlxalq aləmdə layiqli yer tutduğunu, xarici dövlətlərin Azərbaycanla hesablaşdığını deyib: "Bunun nəticəsi olaraq regionda həyata keçirilən bütün beynəlxalq, iri miqyaslı layihələr Azərbaycanın iştirakı ilə və onun milli maraqlarının nəzərə alınması ilə həyata keçirilir". Avropa Şurasının məhz Azərbaycanın təkidilə Ermənistanı işğalçı dövlət kimi tanıdığını bildirən İlham Əliyev bu kimi proseslərin davam edəcəyini və Azərbaycanın beynəlxalq aləmdə daha da möhkəm mövqeyə sahib olacağını deyib. Prezident Azərbaycanın qonşu dövlətlərlə münasibətlərinin uğurla inkişaf etməkdə olduğunu, bununla yanaşı regional əməkdaşlığın da inkişaf etdiyini söyləyib: "Mənim andiçmə mərasimimə bir çox dövlət rəhbərlərinin gəlməsi dediklərimi sübut edir". İlham Əliyev mərasimdə iştirak etdiklərinə görə, Gürcüstan prezidenti Eduard Şevardnadzeyə, Rusiya Federasiyası Şurasının sədri Sergey Mironova, Türkiyə baş nazirinin müavini Əbdül Nəsir Şənərə, İranın vitse-prezidenti Seyid Məhəmmədəli Əbtəhiyə və Ukrayna hökumətinin başçısı Viktor Yakuboviçə təşəkkürünü bildirib.Azərbaycanda aparılan iqtisadi islahatlardan söz açan prezident deyib ki, məhz bu islahatların nəticəsi olaraq qısa müddət ərzində ölkə iqtisadiyyatı inkişaf edib: "Son beş il müddətində iqtisadiyyatın ən mühüm göstəricisi olan Ümumi Daxili Məhsul hər il 10 faiz artır, infilyasiyanın səviyyəsi isə 2 faiz təşkil edir. Halbuki on il əvvəl ölkədə infilyasiyanın səviyyəsi min altı yüz faiz idi".
Ölkədə özəl sektorun uğurla inkişaf etdiyini qeyd edən İlham Əliyev Ümumi Daxili Məhsulun formalaşmasında özəl sektorun payının 70 faiz olmasının sevindirici hal olduğunu deyib. Genişmiqyaslı özəlləşdirmə proqramının həyata keçirilməsindən, torpaq islahatının aparılmasından danışan prezident torpağın artıq kəndlinin özəl mülkiyyətinə verildiyini deyərək bildirib ki, bunun nəticəsində kənd təsərrüfatı istehsalı artıb: "Bütün bunlar onu göstərir ki, Azərbaycanda Heydər Əliyevin rəhbərliyilə aparılan islahatlar öz nəticələrini verməkdədir".Sonra İlham Əliyev ölkəyə xarici sərmayələrin cəlb olunmasından söz açıb. Bu işin də yüksək səviyyədə aparıldığını deyən dövlət başçısı bütün mənbələrdən Azərbaycana qoyulan investisiyanın həcminin 15 milyard dollar məbləğində olduğunu bildirib. Xarici investisiyanın əsasən sabitliyin mövcud olduğu ölkələrə qoyulduğunu qeyd edən İlham Əliyev xarici investorlar üçün Azərbaycanın bu baxımdan məqbul ölkə olduğunu vurğulayıb. İlham Əliyev ölkə iqtisadiyyatı təqaüdlərin 40 faiz artırıldığını xatırladıb: "Bu bir daha onu göstərir ki, sosial məsələlər daim diqqət mərkəzindədir və bu indidən sonra da belə olacaq. Biz hamımız birləşərək Azərbaycanı zəngin, qüdrətli bir ölkəyə çevirəcəyik".Ölkədə ordu quruculuğundan söz açan İlham Əliyev bu sahədə də mühüm işlər görüldüyünü və görüləcəyini bildirib: "Bu məsələ daim mənim diqqətimdə olacaq. Əminəm ki, Azərbaycan ordusu ən yüksək standartlara cavab verəcək və qarşısında duran bütün vəzifələri yerinə yetirəcək".Sonra prezident Dağlıq Qarabağ problemindən danışıb. Uzun illərdir ki, Azərbaycanın atəşkəs rejimində yaşadığını xatırladan İlham Əliyev təəssüflə bildirib ki, bu məsələ ilə bilavasitə məşğul olan ATƏT-in Minsk qrupunun fəaliyyəti hələlik heç bir nəticə vermir: "Amma biz hələ də ümid edirik ki, həmsədrlər bu məsələ ilə daha məsuliyyətli məşğul olacaqlar və müsbət nəticələr əldə edəcəklər". Prezident hesab edir ki, sözügedən problem bir neçə prinsip əsasında, əsasən də beynəlxalq hüquq normaları əsasında həll oluna bilər: "İstənilən halda Azərbaycan torpaqları işğaldan azad olunmalıdır, bir milyon qaçqın öz doğma torpaqlarına qayıtmalıdır və ölkəmizin ərazi bütövlüyü bərpa olunmalıdır".

İlham Əliyev Azərbaycanın öz torpaqlarının itirilməsilə heç bir zaman barışmayacağını deyib: "Baxmayaraq ki, biz sülhün tərəfdarıyıq, hamı onu da bilməlidir ki, səbrimiz də tükənməz deyil. Azərbaycan öz torpaqlarını nəyin bahasına olursa-olsun azad edəcək".Sonra İlham Əliyev Azərbaycanın xoşbəxt gələcəyinə inandığını, ölkənin inkişaf edəcəyinə əmin olduğunu bildirib: "Bütün bunlara nail olmaq üçün çox işlər görülməlidir. Amma ən əsası bu işlərin həyata keçirilməsi üçün Azərbaycanda Heydər Əliyev siyasəti davam etdirilməsidir. Mən Azərbaycan xalqına söz verirəm ki, bu siyasətə sadiq qalacağam, daim Heydər Əliyev siyasətini davam etdirəcəyəm". 525-ci qəzet
daha çox oxuyun    [1] [2] [3] [4] [5] [6] [7] [8] [9]
"SMILE" informasiya mərkəzi
əlaqə telefonları: 658-182; 652-652; admin@secki.info